Komisioni Evropian po ashtu riafirmon nevojën për certifikata të vaksinimit, por ua lë në dorë qeverive të BE-së të përcaktojnë kushtet dhe privilegjet që dokumenti do t’i mundësonte
Komisioni Evropian u bëri thirrjeve vendeve anëtare të Bashkimit Evropian (BE) të shpejtojnë fushatat e vaksinimit kundër koronavirusit të ri (COVID-19).
Në një propozim të zbuluar nga komisionerët Margaritis Schinas dhe Stella Kyriakides, organi i BE-së sugjeroi që vendet anëtare të vaksinojnë të paktën 70 për qind të popullsisë së rritur deri në verë.
Rekomandimi po ashtu kërkon nga vendet e BE-së që deri në muajin mars të vaksinojnë 80 për qind të punonjësve shëndetësore dhe të moshuarve mbi 80-vjeç.
Komisioni Evropian po ashtu riafirmon nevojën për certifikata të vaksinimit, por ua lë në dorë qeverive të BE-së të përcaktojnë kushtet dhe privilegjet që dokumenti do t’i mundësonte.
Stella Kyriakides, komisionere për shëndetësi, e quajti “të nxituar” të flasë për përdorime të tjera të cerfikatave përveç se për qëllime mjekësore, por ajo nuk përjashtoi zgjidhjet ndër-kufitare në të ardhmen.
Megjithatë, organi i BE-së rekomandon që shtetet të bien dakord mbi një qasje të përbashkët deri në fund të muajit janar.
Në një letër për Komisionin Evropian javën e kaluar, kryeministri grek, Kyriakos Mitsotakis, propozoi një certifikatë të vaksinimit COVID-19 për të gjithë BE-në, që do të mundësonte udhëtimin pa pengesa.
Në një përpjekje për të shpëtuar sezonin e ardhshëm turistik, kryeministri Mitsotakis sugjeroi t’u mundësojë lëvizje të lirë atyre që tashmë janë vaksinuar.
Pavarësisht se Mitsotakis mohoi idenë e bërjes së vaksinimit të detyrueshëm ose parakusht për udhëtimet, sugjerimi i tij tashmë ka ndarë liderët e BE-së.
Presidenti rumun, Klaus Iohannis, tha se ai nuk e mbështet kryeministrin grek, sepse kjo do të “ndajë popullsinë e Evropës në dy anë”.
Presidenti i Këshillit Evropian, Charles Michel, po ashtu paralajmëroi se këto certifikata udhëtimi duhet të paraqiten pasi një numër i madh i njerëzve tashmë kanë marrë dozat e vaksinës. Përndryshe, qeveritë rrezikojnë të krijojnë zhgënjim të madh.
Krerët e vendeve dhe qeverive të BE-së të enjten do të diskutojnë propozimin e Komisionit Evropian dhe kushtet e certifikatave të vaksinimit gjatë një video-konference kushtuar koordinimit në përgjigje ndaj pandemisë COVID-19.
Vaksina për fqinjët
Margaritis Schinas, zv/presidente e Komisionit Evropian, konfirmoi synimin e bllokut evropian për të ndihmuar vendet e tjera me vaksina në emër të solidaritetit evropian.
“Fqinjët, partnerët dhe miqtë tanë duhet të jenë të sigurt se BE duhet dhe do t’i ndihmojë me vaksinat”, tha Schinas.
Ai shtoi se “askush nuk është i sigurt derisa të gjithë të jenë të sigurt”.
Megjithatë, të dy komisionerët refuzuan të përmendin vendet që do të mbështeten ose të tregojnë një kornizë kohore.
BE, e cila ka një popullsi prej 450 milionë banorësh, arriti marrëveshje me gjashtë prodhues të vaksinave, respektivisht me kompanitë Pfizer/BioNTech, Moderna, AstraZeneca, CureVac, Johnson&Johnson dhe Sanofi/GlaxoSmithKline, nga të cilat parashikon të blejë rreth 2.3 miliardë doza vaksinash.
