Presim shkurti të jetë kyç për realizimin e masave të pakos së pestë të masave ekonomike dhe i porosis deputetët në Kuvend ta miratojnë skemën garantuese që të mund të zbatohet, tha sot ministri i Ekonomisë, Kreshnik Bekteshi.
“Jam i bindur se zgjidhjet ligjore të ardhshme të cilat dalin nga pakoja e pestë e masave ekonomike do të mbështeten edhe nga opozita, pasi publikisht thonë se janë për mbështetjen e qytetarëve dhe ekonomisë në tërësi”, deklaroi Bekteshi në përgjigjen e pyetjes pas vizitës së sotme të kompanisë Rade Konçar TEP.
Qeveria dhe të gjithë që marrin pjesë në këshillin socio-ekonomik, shtoi, dëshirojnë të sjellin masa sa më të mira që t’i dalim në ndihmë ekonomisë veçanërisht sektorit hotelierik dhe turimzmit.
“Disa masa të caktuara janë paraparë edhe në pakon e pestë të masave ekonomike në pjesën e pagesës së pagave, por njëherësh edhe me ofrimin e kredive pa interes dhe ngjashëm. Shumica e kërkesave të sektorit hotelierik dhe turizmit do të pranohen. Si institucion tashmë kemi bërë analizat përkatëse dhe nuk do të mbetemi pasivë, por masat do të jenë në drejtim të proaktivizimit edhe të institucioneve por edhe të hotelierëve. Të gjithë ata të cilët në fund të vitit 2021 do të dëshmojnë rezultate shtesë të viteve të kaluara duke i përfshirë edhe vitin 2019 dhe 2020 do të ndihmohen më shumë. Ata të cilët do të jenë pasivë do të ndihmohen si të gjitha firmat të cilat do t’i përmbushin kushtet”, tha Bekteshi.
Paralajmëroi se gjatë fundit të kuartalit të parë të këtij viti do të publikohet thirrja publike për vauçerët për turizmin vendor nga Ministria e Ekonomisë.
“Do të ketë kritere të ndryshme prej vauçerëve të dhënë paraprakisht gjatë pandemisë. Vlera e çdo vauçeri do t jetë 250 euro për familjet të cilat janë më të goditura dhe kanë të ardhura më pak se 30.000 denarë”, saktëson Bekteshi.
