Nga Shkodra ku vijoi turin e tij anti-Basha, ish-kryeministri Sali Berisha u shpreh se kishte ndërmend të largohej, por pas kësaj që ndodhi me vendimin personal të Lulzim Bashës vendosi për rikthimin. Berisha deklaroi se Basha tradhëtoi demokratët, duke shtuar se nuk ka qenë ai që e vendosi në krye të PD-së.
Shkodra, një bastion i kahershëm i demokratëve, i ofroi Sali Berishës të premten një pritje entuziaste në kuadër të turit të tij për largimin e Lulzim Bashës nga drejtimi i selisë blu.
Mbështetës të shumtë mbushën sallën ku do të mbahej foltorja e radhës ndërsa me dhjetra të tjerë e ndoqën fjalën e ish-kryetarit përmes ekranit.
Sali Berisha tha se Shkodra është diskriminuar gjatë 8 viteve nga qeveria Rama, teksa renditi rekordet negative të saj.
Berisha e bëri të qartë se beteja e tij e re nuk lidhet personalisht me Bashën, për të cilin tha se në mbrojtje të tij tashmë ka dalë edhe qeveria.
Berisha: Tani del Basha dhe krijon komisione hetimore, për të gënjyer njerëzit. Po çfarë do të arrijë me komisionet? Se duhet të shkonte në të gjitha kancelaritë botërore dhe të thoshte se janë vjedhur zgjedhjet. Tani po i bën vetëm furça Ramës. Ndaj dhe ky probleme është fund e krye tradhti ndaj jush e shqiptarëve. Në mbrojtje të kryetarit është vërsulur e gjithë propaganda e qeverisë. Përpiqen që të paraqesin variante të ndryshme, por e vërteta është se pengu është krejtësisht e pashpresë. Kjo nuk është një çështje mes Berishës dhe Bashës, por një çështje mes besëprerit dhe njeriut me besë, edhe pse nuk e them këtë. Kjo është një çështje themelore e pluralizmit shqiptar. Pluralizmi është në gijotinë këtë herë. Shqipëria ka një narkokryetar dhe një peng të tij, që është Lulzim Basha.
Ai e akuzoi Lulzim Bashën për tradhti ndaj demokratëve dhe asgjësim të pluralizmit.
Berisha siguroi demokratët se Bashën nuk e ka vendosur ai në krye të PD-së ndërsa merr peshën e tij të fajit për gjendjen ku ndodhet sot kjo forcë politike.
Sali Berisha iu bëri thirrje demokratëve të bashkohen nëse duan të ekzistojë PD./Ora News/
