Kryetari i Partise Demokratike, Sali Berisha ka theksuar mbështetjen e plotë të opozitës shqiptare për çdo punonjës të zbatimit të ligjit, përfshirë policinë, shërbimin informativ, BKH-në, prokurorët dhe gjykatësit.
“Ky takim sot, ndër të tjera synon t’u shprehë mbështetje të plotë atyre që zbatojnë ligjin në këtë vend. Dhe, opozita ka qenë, është dhe do mbetet e përcaktuar për shtetin ligjor, Kushtetutën si kuadri më i mirë për respektimin e lirive dhe të drejtave të qytetarëve. Natyrisht duke thënë këtë, opozita ka qëndruar dhe qëndron ndaj çdo shkelje, ndaj çdo dhune ligjore të përdorur për qëllime politike. Dhe këtu, ne jemi të palëkundur në këtë qëndrim”, u shpreh Berisha.
Ai kritikoi qeverinë për sjellje që e përshkroi si tipike për një “narkoshtet”, duke përmendur rastet kur prokurorë dhe gjykatës u sulmuan apo kur zyrtarë të lartë u detyruan të japin dorëheqjen për shkak të presionit politik.
“Mos harroni një zëvendëskryeministër, pa kërkuar prokuroria, pa paraqitur kërkesën për hetim, dorëzoi mandatin dhe postin. Dhe ky ishte Ilir Meta. Sapo doli një dokument 100 përqind i manipuluar dhe falsifikuar nga Edi Rama dhe Filip Çakulli. E faktuar kjo. Sepse kodi etik dhe moral nuk e jetonte, më tha ai mua, nuk mund të shkoj unë si zëvendëskryeministër tek hetuesi. Do shkoj si qytetar i thjeshtë tek ai. Fatmir Mediu, për një çështje që ishte absolutisht tërësisht e aparatit ushtarak, strikt, dha dorëheqjen nga posti dhe shkoi para hetimit.Një ministër tjetër, Ilir Rusmali u shkarkua brenda 24 orëve për qëndrimin që mbajti ndaj drejtorit që dënonte korrupsionin.Ilir Rusmali ishte bashkëpunëtori i afërt, por kur shkarkoi drejtorin për shkak të ndërhyrjes së vëllait, Ilir Rusmali u shkarkua”, vijoi kreu demokrat.
Berisha denoncoi gjithashtu çdo formë kërcënimi ndaj punonjësve të ligjit dhe familjarëve të tyre, duke paralajmëruar se për çdo akt të tillë, qeveria do të mbajë përgjegjësi personale. Ai akuzoi Edi Ramën dhe zyrtarë të tjerë të qeverisë për manipulim dhe falsifikim provash, duke e quajtur situatën aktuale të paprecedentë dhe të rrezikshme për shtetin ligjor.
Opozita, sipas tij, nuk ka përdorur dhunë ndaj organeve të drejtësisë, por ka mbrojtur ndarjen e pushteteve dhe integritetin e shtetit ligjor.
