Në konferencë me gazetarët, kreu i Partisë Demokratike, Sali Berisha premtoi se të gjitha pikat e paraqitura në programin elektoral për zgjedhjet e 11 Majit, me marrjen e pushtetit do të bëhen reale të gjitha.
“Tani, programet paraqiten në fushatë elektorale, por paketën e dhembshurisë, thelbin e saj, ne e paraqitëm edhe para 15 muajsh dhe ne e mbrojtëm në komisionet parlamentare. Por ajo u refuzua në mënyrë kategorike. Natyrisht çdo forcë politike, programin e qeverisjes e paraqet para dhe gjatë fushatës elektorale. Forca tjetër politike, siç e shihni, pa program, me duar në xhepa, u detyrua të kopjojë, pasi e pa që shqiptarët nuk e pranuan më, e refuzuan paraqitjen e tij me banorët e parkut zoologjik dhe të pellgjeve, u kthye duke kopjuar programin tonë se nuk ka çfarë të thotë. Këtë mund të them lidhur me pyetjen tuaj. Janë plotësisht të përllogaritura të gjitha dhe do realizohen 100%. Kjo është një gjë e sigurt”, tha Berisha.
Berisha tha se nëse nuk do të kishim korrupsion, nuk do të kishim largim të rinisë nga vendi, nuk do të kishim mungesë të ilaçeve, inceneratori i Tiranës do të ishte vënë në funksion. Dhe premtoi se kjo do të ndryshojë kur të vijnë në pushtet.
“Po të thoni, do u them një moment, shumë flitet për korrupsionin, po korrupsioni është nëna e të gjitha të këqijave. Në qoftë se nuk do kishte korrupsion, do kishim sot djegësin e Tiranës, i cili do ishte i fuqishëm për të djegur të gjithë mbetjet e Shqipërisë së mesme, jo vetëm të Tiranës. Mirëpo aty nuk ka tullë. Atë e hëngri korrupsioni. Në qoftë se nuk do kishim korrupsion, nuk do vdisnin të sëmurët për mungesë ilaçesh siç ndodh çdo ditë tashmë. Dhe njeriu, që e ka detyrë personale si kryeministër, që ato të mos mungojnë, lan duart e thotë po janë krime kundër njerëzimit. Sikur ia bën opozita dhe jo ai vetë. Korrupsioni plaçkit, grabit paratë e atyre ilaçeve.
Korrupsioni është faktor kryesor i largimit të shqiptarëve nga Shqipëria se këta mbeten me pensione të ulëta, me rroga të ulëta. Po marrim rënien e kursit të Euros. Sigurisht që buxheti i shtetit, qoftë edhe duke marrë kredi, duhet t’u përgjigjej këtyre eksportuesve, se këta eksportues janë punësuesit kryesorë. Punësonin dhjetëra mijëra punonjës. Ishin dhjetëra mijëra familje që ushqeheshin. Ata ranë njëra pas tjetrës dhe njerëzit ikin, ikin ikin. Dhe kjo krijon një pasiguri të madhe në vend. Imagjino tani qindra mijëra prindër, gjyshër, që u largohen fëmijët e tyre, që u largohen fëmijët e tyre në çfarë pasigurie mbeten ata këtu në vetminë e tyre. Dhe pse u ikin? U ikin sepse ata nuk i mbajnë dot me pensionet e tyre, u ikin sepse nuk kanë vende pune. Pra është gjithë kjo situatë që do të ndryshojë me shpejtësi të madhe. Me zero tolerancë ndaj korrupsionit, zero tolerancë ndaj krimit. Dhe ata të harrojnë se mund të lajë kush pare në ndërtim. Atje ku janë, do i kapim dhe do i sjellim këtu, para ligjit, siç e kemi provuar atë”, tha Berisha.
Ndërsa sa i përket shumës me të cilën është paguar Chris La Civita, që do të bashkëpunojë për fushatën elektorale të PD, Berisha tha se çdo gjë do të jetë transparente.
“Datën e ardhjes, unë u garantoj që do të vijë, por po e lë si surprizë për Edi Ramën që t’i bjerë kokës në tavolinë kur të vijë. Nuk po ua them se duhet ta ketë surprizë ai. Do vijë. Sherifi do vijë. Chris do vijë. Çdo gjë, ju siguroj se çdo shpenzim i kësaj partie, do të jetë transparent dhe në përputhje me ligjet e Shqipërisë dhe ligjet e vendit tjetër. Prandaj këtu nuk mund të ketë asnjë lloj aludimi tjetër. Do jetë edhe në zyrë, edhe online. Tani online e kemi çdo ditë sa për dijeni. Çdo ditë punojmë me të, funksionon me këshilla, me probleme. Do ketë një njeri të kompanisë së tyre të instaluar përfundimisht. Ai do shkojë, do vijë. Kjo është praktika e punës me këto kompani konsultative elektorale”, tha Berisha.
