Paga minimale në vend, nga sot, do të jetë 50 mijë lekë. Sipas vendimit të Këshillit të Ministrave, paga rritet me 10 mijë lekë. Përfitues, sipas Ministrisë së Ekonomisë, janë 307 mijë punonjës në sektorin publik dhe privat.

“Do të ketë një rritje të lehtë të pagës për një pjesë të punonjësve dhe, normalisht, ka efekte pozitive. Aspekti i dytë, shumë i rëndësishëm, është edhe rritja e të ardhurave në skemën e sigurimeve shoqërore; presim një përmirësim të skemës së pensioneve”, shprehet Klodian Muço, ekspert për ekonominë.

Për 9 muajt e parë, qeveria do të mbulojë kostot e rritura për bizneset nga rritja e pagës minimale.

“Paga minimale, në një farë mënyre, është edhe një formë për të formalizuar pjesën e ekonomisë. Një pjesë e kompanive kanë tendencën të përdorin dy bilance për të mbajtur paga minimale, por realisht nuk paguajnë me paga minimale. Kështu që kjo ndihmon edhe në formalizimin e ekonomisë.”

Advertisement

---

MONEYGRAM

Nga sot nis edhe rritja e përmuajshme e pensioneve, nga e cila përfitojnë rreth 760 mijë pensionistë, të ndarë sipas kategorive.

“Një ndër shtresat më vulnerabël të shoqërisë janë pensionistët; sot që flasim janë rreth 112 mijë pensionistë që marrin pension minimal.”

Pensioni urban me vite të plota pune do të rritet me 1 mijë e 800 lekë; pensioni urban i pjesshëm do të rritet me 800 lekë; pensioni rural do të rritet me 1 mijë lekë; pensioni familjar do të rritet me 700 lekë; pensioni i invaliditetit do të rritet me 600 lekë.

Advertisement

---

MONEYGRAM

Sigurime më të shtrenjta për shoferët që kanë shkaktuar dëme dhe zbritje për ata të rregullt, sistem bonus malus hyn në fuqi nga janari 2026.

Të gjithë shoferëve të automjeteve do t’i aplikohet kjo rregullore e cila u miratua në 2025 por nuk u zbatua duke e konsideruar vitin që lamë pas si vitin 0.

Rregullorja e re përfshin 7 faktorë risku që shtrenjtojnë siguracionin si fuqia motorike, mosha e re shoferit, eksperienca e tij në drejtimin e makinës, përdorimi i mjetit, qarku i regjistrimit të mjetit, vjetërsia e makinës dhe historiku me aksidentet. Por kjo është kundërshtuar dhe në komisionet parlamentare dhe është kërkuar ndërhyrja në të.

Praktikisht ata qytetarë që kanë regjistruar mjetin në Berat, Dibër apo Kukës përfitojnë lehtësi, ose bonus ndërsa ata që janë të regjistruar në Tiranë e qarqet e tjera penalizohen për shkak të incidencës së lartë të aksidenteve

Advertisement

---

MONEYGRAM

Dy figura të politikës shqiptare, kryetari i Bashkisë së Tiranës Erion Veliaj dhe presidenti i Partisë së Lirisë, Ilir Meta, kanë përcjellë urimet e tyre për Vitin e Ri 2026, edhe pse ndodhen në paraburgim.

Erion Veliaj iu drejtua qytetarëve të Tiranës dhe mbarë Shqipërisë me një mesazh të gjatë e emocional, ku uroi shëndet, lumturi, arritje dhe shpresë për vitin e ri. Në fjalën e tij, ai vuri theks të veçantë te solidariteti dhe mbështetja për shtresat më në nevojë të shoqërisë.

“Një urim zemre për të pamundurit, për të sëmurët, për ata që ndihen të braktisur, për familjet në vështirësi, për emigrantët që punojnë me djersë larg shtëpisë – ju uroj forcë dhe ngrohtësi këtë vit të ri.”, shkruan Veliaj.

Ndërkohë, edhe ish-presidenti Ilir Meta përcolli një mesazh urimi për qytetarët shqiptarë, duke u dëshiruar shëndet, paqe, gëzim dhe mbarësi. Meta e përshkroi vitin 2026 si “vitin e bashkimit, të guximit qytetar dhe të ringjalljes së shpresës”, duke nënvizuar nevojën për përballje të vendosur me sfidat dhe angazhim për një Shqipëri më të drejtë, më sociale dhe më njerëzore. Ai theksoi rëndësinë e barazisë para ligjit, respektimit të lirive dhe dinjitetit njerëzor, si dhe krijimit të mundësive që çdo qytetar të jetojë me siguri dhe mirëqenie në vendin e tij.