Ndërkohë, që Lulzim Basha dhe grupi parlamentar i PD do të votojnë pro zgjatjes së mandatit të vettingut, Sali Berisha deklaroi votën e tij kundër.
I pyetur nga gazetarët para futjes në Kuvend, ai dha se pengu dhe pengmarrësi janë në bashkëqeverisje, duke iu referuar kreut të PD dhe kryeministrit Edi Rama.
Procesin e vettingut ish-kryeministri e cilësoi si gjah shtrigash i përdorur me disa standarde dhe tha se kurrë nuk do ta votojë kurrë një proces që nuk e besojnë më qytetarët shqiptarë.
“Është bashkëqeverisja e pengut me pengmarrësin. Unë i kam shprehur të gjithë qëndrimet e mia ndaj këtij procesi gjigant korruptiv që shoqërohet në çdo hap me shkelje të rënda ligjore të konstatuara dhe u përdor për gjah shtrigash nga Edi Rama me ndihmën e mikut të tij Soros. U përdorën disa standarde dhe ky është një proces i flakur që nuk i beson më shoqëria shqiptare. Unë kurrë nuk do të votoj kundër atyre që besojnë shqiptarët”, tha Berisha.
Gjithashtu në prononcimin e tij para mediave Berisha komentoi edhe takimin e kryeministrit Edi Rama me banorët e “5 Majit” që u janë shembur banesat. Ish-kryeministri tha edhe njëherë se do të sjellin nismën në Kuvend për këtë çështje.
“Të ftosh qytetarët më bisedime është një akt moral, tu përplasësh tavolinën me grusht është një arrogancë ekstreme. Për të gjitha këto dënon me ashpërsinë më të madhe do të merren nisma ligjore për mbrojtjen e banesave të qytetarëve shqiptarë. Me praktikën që po ndjek kreu i Meduzës janë mijëra banesa të pasigurta në Shqipëri. Ju e keni raportuar vetëm midis atyre që iu prishen shtëpitë janë me tapi 50 vjeçare. Që të gjithë janë ndërtuar para vitit 2014, gjer në atë vit ligji parashikonte legalizimin para urbanizimi. Nuk jam për të penguar urbanizimin, jam në mënyrë kategorike kundër shkatërrimit të pronave të qytetarëve pa dëmshpërblimin e plotë”, u shpreh Berisha.
