Gjirokastra ishte ndalesa e radhës e ish-kryeministrit Sali Berisha për të festuar 31-vjetori n e themelimit të Partisë Demokratike.
Kur kanë mbetur 2 ditë nga tubimi i të shtunës, Berisha u bëri thirrje sërish deputetëve përkrah Bashës dhe demokratëve për reflektim.
Berisha: Dua tu bëj thirrje deputetëve të PD dhe të gjithë demokratëve, mos u bëni pjesë e një skenari makabër kundër pluralizimit. Nuk është çështja këtu midis Sali Berishës dhe Lulzim Bashës, çështja këtu është te raporti jetim për një shoqëri të lirë, raporti shumicë-pakicë. Mos u bëni skllevër të një njeriu që ju shet dhe blen çdo ditë për interesa të veta. Kjo është partia juaj dhe ju jeni deputetët e saj, ju të tjerët që nuk jeni deputetë keni investimet tuaja që ne ua respektojmë. Të bashkohemi me 8 janar, të gjithë së bashku në një manifestim proteste si në një Festival të shkojmë në shtëpinë tonë, në shtëpinë e demokratëve, të zbatojmë vendimin e 44 mijë anëtarëve të PD, të cilin peng Basha nuk do ta njohë. Është mision.
Berisha tha se Basha e ka kthyer shtëpinë e demokratëve në bunker ku mund të futen vetëm banditë, vrasës e kriminelë.
Berisha: Në vend të kësaj ai në historinë më të turpshme dhe të padëgjuar ka tre javë që vë blinde e brava dhe e ka shndërruar tempullin tonë, tempullin e demomkratëve shqiptarë në një ndërtesë burg, një ndërtesë bunker për punonjësit e saj, ndërtesë në të cilën futen banditë, vrasës dhe kriminelë me emër dhe mbiemër por nuk futen dot deputetët e PD, zyrtarët e saj.
Nuk la pa ironizuar dhe hyrjen e veçantë për kryetarin.
Berisha: Së fundi shpiku si Enveri derën e kryetarit nga e cila mund të futet vetëm Lulzim brava për çështje sigurie dhe asnjë tjetër.
Bashkë me thirrjen për pjesëmarrje masive në protestë, ai pati dhe një paralajmërim për Ramën.
Berisha: Dua të paralajmëroj Edi Ramën, ky është një revolucion demokratik paqësor sepse ne të tillë jemi, edhe kur kanë gjuajtur mbi ne këtu në Gjirokastër demokratët e Gjirokastrës nuk kthyen armët por organizuan qëndresën, shtuan radhët dhe bënë gjithçka që revolucioni i tyre të triumfojë në mënyrë paqësore. Po këtë do të bëjmë sot pas 31 vitesh, më të vendosur se kurrë kauzën ta çojmë deri në fund.
