Beyoncé dhe bashkëshorti i saj, Jay-Z, raportohet se janë në fazat e fundit të blerjes së rreth 23 hektarëve tokë në Cotswolds, një nga zonat më të kërkuara rurale në Mbretërinë e Bashkuar.
Çifti ka marrë tashmë lejen e planifikimit për ndërtimin e një rezidence madhështore, e cila sipas projekteve arkitektonike do të përfshijë shtatë dhoma gjumi, nëntë banjo dhe pamje nga një liqen privat.
Çmimi orientues i tokës është 7.5 milionë funte (8.8 milionë euro), por vlera e pronës së re pritet të kalojë 18 milionë funte (21.1 milionë euro) sapo të përfundojë ndërtimi.
Sipas Daily Mail, reagimet e banorëve lokalë janë të përziera: disa e kanë pritur lajmin me indiferencë, ndërsa të tjerë kanë shprehur shqetësime se ardhja e yjeve të tillë mund të ndryshojë karakterin e qetë të zonës dhe të ndikojë në mundësitë e tyre për strehim.
Agjentët imobiliarë e kanë cilësuar Cotswolds si “Hamptons i Mbretërisë së Bashkuar”, falë jetës luksoze, klubeve private dhe ambientit ekskluziv që e bëjnë këtë destinacion gjithnjë e më të preferuar nga të pasurit e famshëm.
Beyoncé dhe Jay-Z zotërojnë tashmë rezidenca spektakolare në Malibu dhe Bel Air, por duket se kërkojnë një bazë të re në Evropë. Sipas miqve të afërt, këngëtarja është e lidhur ngushtë me Mbretërinë e Bashkuar dhe e sheh vendin si një hapësirë të sigurt dhe të përshtatshme për familjen e saj.
Nëse marrëveshja finalizohet, ata do të bëhen pjesë e të ashtuquajturit “Grupi Chipping Norton”, një komunitet i njohur për yje dhe personalitete të famshme që e kanë kthyer Cotswolds në një nga fshatrat më trend të Britanisë.
