Këshilltari i kryeministrit të Republikës së Kosovës, Srdjan Jovanovic, është ndaluar sot nga policia serbe në pikëkalimin kufitar Dheu i Bardhë.
Ai ishte ndaluar nga disa anëtarë të MUP-it serb, derisa ishte nisur për në Vranje.
Anëtarët e MUP-it serb i kishin thënë se urdhri për ta ndaluar u kishte ardhur nga shërbimi i inteligjencës serbe (BIA), dhe më pas sipas njoftimit të partisë së Sllobodan Petroviqit, i cili javë më parë është sulmuar fizikisht nga dy zyrtarë të Listës Serbe.
Jovanoviq ishte nisur për në Serbi për vizitë private, por u ndalua nga anëtarët e MUP-it.
Kjo nuk është hera e parë që autoritetet serbe ndërmarrin veprime të tilla ndaj anëtarëve të SLS-së.
Më herët janë ndaluar edhe Sllobodan Petroviq, Boban Stankoviq, Nebojsha Javkovljevic dhe Srecko Spasic.
“Partia e Pavarur Liberale nuk i kupton këto tentime për frikësim dhe keqtrajtim. Për të pestën herë ne u bëjmë thirrje Bashkimit Evropian dhe të gjithë institucioneve të reagojnë lidhur më këto veprime”, thuhet në komunikatë.
Këto veprime të autoriteteve serbe ndaj zyrtarëve të SLS-së vijnë pasi që partia e Petroviqit po bashkëpunon me institucione të Republikës së Kosovës dhe nuk dëgjon urdhrat e Aleksander Vuçiqit sikurse Lista Serbe.
