Presidenti amerikan, Joe Biden kritikoi mbrëmë rivalin republikan, Donald Trump për takimin me Viktor Orbanin, duke thënë se kryeministri hungarez po kërkonte të vendoste një diktaturë.
Orban njoftoi gjatë ditës së djeshme se është takuar me “mikun e tij të mirë” Donald Trumpin në Florida, raporton cnn.
Udhëheqësi hungarez është një nga liderët e paktë në Evropë që përkrah kandidatin republikan në zgjedhjet presidenciale të nëntorit kundër demokratit Biden.
“A e dini se me kë po takohet sot në Mar-a-Lago?”, Biden u tha mbështetësve gjatë një tubimi të fushatës. “Orbanin nga Hungaria, i cili tha hapur se nuk mendon se demokracia funksionon dhe se ai dëshiron një diktaturë. Unë shoh një të ardhme në të cilën ne mbrojmë demokracinë, jo në të cilën e dobësojmë atë”, tha 81-vjeçari demokrat.
Orban ka publikuar mbrëmë në rrjetet sociale një foto me ish-presidentin amerikan me fjalët, “Make America Great Again”, që është slogani i fushatës së Trumpit. “Kthehu dhe na sill paqen president”, shkroi hungarezi në platformën X.
Ndryshe, Hungaria është i vetmi anëtar i Bashkimit Evropian që ka mbajtur lidhje të ngushta me Kremlinin pavarësisht pushtimit rus të Ukrainës në shkurt të vitit 2022.
Orban refuzon të dërgojë mbështetje ushtarake në Ukrainë dhe rregullisht bën thirrje për një armëpushim, i bindur se Kievi nuk mund të fitojë kundër Rusisë.
Trump po u kërkon vazhdimisht republikanëve në Kongresin amerikan që të bllokojnë projektligjin që parasheh 60 miliardë dollarë ndihmë ushtarake amerikane për Kievin.
