Presidenti amerikan, Joe Biden tha se Shtetet e Bashkuara të Amerikës kanë në plan të dislokojnë trupa shtesë në Evropën Lindore, pasi vendet e NATO-s kërkojnë të rrisin praninë e tyre si pjesë e një përplasjeje të mundshme me Rusinë.
Biden tha dje se do të lëvizte trupat amerikane në rajon “në një të ardhme të afërt”, pa dhënë më shumë detaje mbi numrat e mundshëm.
Biden urdhëroi të hënën që 8 500 ushtarë të viheshin në gatishmëri të shtuar, në mënyrë që ata të mund të dislokoheshin me shpejtësi nëse do të ishte e nevojshme.
Ai theksoi se ishte një masë paraprake për të adresuar shqetësimet e anëtarëve të Evropës Lindore të NATO-s.
Ai tha se asnjë ushtar amerikan nuk do të dërgohej në Ukrainë.
Dhjetëra mijëra trupa amerikane janë zakonisht të stacionuara në Evropë, përfshirë rreth 35 000 në Gjermani.
Sekretari i Mbrojtjes i SHBA-së, Lloyd Austin tha më herët të premten se nuk kishte ende urdhër për dërgimin e trupave.