Presidenti i Shteteve të Bashkuara të Amerikës, Joe Biden siguroi donatorët demokratë se ai ende mund t’i fitojë zgjedhjet presidenciale të nëntorit kundër Donald Trump, pasi performanca e dobët e debatit të parë mes të dyve nxiti shqetësimin për kandidaturën e tij.
Presidenti 81 vjeçari mori pjesë në disa evente për mbledhje fondesh në Nju Jork dhe Nju Xhersi dhe mbrojti performancën e tij në debatin presidencial të CNN.
“Unë nuk kalova një natë të mrekullueshme, por as Trump. Ju premtoj se do t’i fitojmë këto zgjedhje”, tha Biden.
Presidenti tha se e kuptonte shqetësimin, por u zotua të luftojë më fort.
Kryetarja e fushatës Jennifer O’Malley Dillon deklaroi të shtunën se sondazhet e brendshme pas debatit treguan se opinionet e votuesve nuk u ndryshuan.
Disa orë pas përballjes, Trump u tha mbështetësve të tij se ai e konsideronte debatin një “fitore të madhe” për fushatën e tij.
