Presidenti i Shteteve të Bashkuara, Joe Biden, të mërkurën niset për në Bruksel për bisedime me udhëheqësit evropianë për pushtimin rus të Ukrainës, duke sjellë me vete plane për më shumë sanksione ndaj Moskës. Sipas burimeve, në këto sanksione pritet të përfshihen disa deputetë rusë.
Bideni do të largohet nga Shtëpia e Bardhë në orën 8 e 40 minuta në mëngjes për udhëtimin ku do të përfshihen bisedimet në Bruksel me udhëheqësit e NATO-s dhe të institucioneve evropiane dhe një vizitë në Varshavë për konsultime me homologun polak, Andrzej Duda.
Dy burime të afërta me situatën thanë se presidenti amerikan dhe ekipi i tij janë duke zhvilluar plane për vendosjen e sanksioneve ndaj anëtarëve të Dumës ruse si ndëshkim për pushtimin e Ukrainës nga Rusia.
Sipas gazetës “The Wall Street Journal”, 300 anëtarë të Dumës mund të përballen me sanksione, por një zëdhënës i Shtëpisë së Bardhë tha: “Nuk janë marrë vendime përfundimtare për atë se kë do të sanksionojmë dhe sa njerëz do të sanksionojmë.”
Këshilltari për siguri kombëtare i Shtëpisë së Bardhë, Jake Sullivan, u tha gazetarëve të martën se Bideni të enjten do të marrë pjesë në një samit urgjent të NATO-s, do të takohet me udhëheqësit e vendeve të grupit “G7” dhe do t’u drejtohet udhëheqësve të 27 vendeve të Bashkimit Evropian në një mbledhje të Këshillit Evropian.
Sullivan tha se presidenti amerikan do të bëjë bashkërendim për fazën e ardhshme të asistencës ushtarake për Ukrainën.
Bideni është zotuar se Shtetet e Bashkuara nuk do të përfshihen në konflikt të drejtpërdrejtë me Rusinë, por ka thënë se vendi i tij do ta mbrojë tërë territorin e NATO-s. Ai ka dhënë urdhër për dërgimin e trupave shtesë në pjesën lindore të NATO-s.
Gjatë vizitës së tij në Poloni, Bideni do t’i vizitojë trupat amerikane dhe do të takohet me ekspertët e përfshirë në punën humanitare për të ndihmuar qindra mijëra ukrainas që janë larguar nga vendi i tyre dhe ata që kanë mbetur atje./
