Biznesi i regjimit të përpunimit aktiv, i njohur ndryshe dhe si biznesi fason, ka aplikuar dhe po realizon një skemë mashtrimi me sigurimet shoqërore të punonjësve.
Alarmin e jep Ministria e Financave nëpërmjet Drejtorisë së Përgjithshme të Tatimeve.
Sipas autoriteteve përgjegjëse që kontrollojnë dhe mbikqyrin si agjent fiscal pagimin e sigurimeve shoqërore dhe shëndetësore, “shoqëri, që operojnë në sektorin fason hapin dhe mbyllin NIPT-e, transferojnë aktivitetin nga një emër në tjetrin me qëllim shmangien e detyrimeve tatimore dhe mospagesën e sigurimeve shoqërore ndaj punëmarrësve”.
Sipas të njëjtit burim, subjekte të ndryshme, që operojnë në këtë sektor dhe, që janë të lidhura me njëra tjetrën, kanë përdorur skemën e hapjes dhe mbylljes së NIPT-ve, kalimin e biznesit nga një emër në një tjetër, me qëllim shmangien e pagesës së Sigurimeve Shoqërore për punonjësit e tyre.
Në subjektet e identifikuara nga Administrata Tatimore janë konstatuar individë me shtetësi shqiptare dhe italiane, që ushtrojnë aktivitete ekonomike në disa qytete të Shqipërisë, të cilët kanë transferuar aktivitetin e tyre nga një emër në një emër tjetër si palë të lidhura, me qëlllim shmangien e mundësisë së Administratës Tatimore për mbledhjen e detyrimeve të punonjësve të tyre.
Sipas njoftimeve zyrtare, Ministria e Financave dhe Administrata Tatimore, e kanë konsideruar këtë fenomen si një nga shkeljet më të rënda që një biznes i bën shtetit dhe punëmarrësit, pasi këto biznese, jo vetëm kanë shmangur detyrimet fiskale, por gjithashtu me veprimet dhe mosveprimet e tyre nëpërmjet skemave të ngritura kanë dëmtuar edhe punonjësit e tyre, të cilëve për një kohë të caktuar nuk i kanë paguar sigurimet shoqërore dhe shëndetësore, duke i rrezikuar pensionin si dhe mbulimin e shërbimeve shëndetësore.
Autoritetet po ndjekin me prioritet hetimet ndaj këtyre shoqërive për të vërtetuar dhe dokumentuar shkeljen e ligjit dhe për t’i kallëzuar këto shoqëri dhe individë përgjegjës me shkelje të rëndë pranë organeve ligjzbatuese.
Nga ana tjetër Ministria e Financave inkurajon çdo të punësuar në Republikën e Shqipërisë të denoncojë pranë tatimeve rastet e mospagesës së kontributeve të sigurimeve shoqërore nga ana e punëdhënësit si e drejtë ligjore që çdo qytetar ka për të siguruar pension në të ardhmen dhe shërbime shëndetësore falas.
