Sekretari amerikan i Shtetit Antony Blinken tha se administrata e Presidentin Joe Biden synon të udhëheqë bllokun ndërkombëtar që është kundër agresionit rus ndaj Ukrainës, në një koalicion më të gjerë për t’i bërë ballë atij që Uashingtoni e sheh si një kërcënim më serioz dhe afatgjatë për rendin global nga Kina.
Në një fjalim në Uashington të enjten, zoti Blinken detajoi politikën e administratës për të konkurruar me Pekinin në një garë për të përcaktuar ekuilibrin ekonomik dhe ushtarak të shekullit të 21-të.
Ndërsa Shtetet e Bashkuara e shohin Rusinë si kërcënimin më të mprehtë dhe të menjëhershëm për stabilitetin ndërkombëtar, zoti Blinken tha se administrata amerikane beson se Kina përbën një rrezik më të madh.
