Autoritetet policore greke në bashkëpunim me Interpol Tiranën kanë arrestuar këtë të martë një shqiptar të shpallur në kërkim ndërkombëtar.
Bëhet fjalë për 55-vjeçarin Kujtim Demiri, të cilin Gjykata e Krimeve të Rënda, në vitin 2010, e ka dënuar me 15 vjet burgim, për veprën penale ‘Trafikimi i të miturve’, kryer në bashkëpunim.
Kujtim Demiri bleu një fëmijë për 10 mijë lekë, të cilin e ka kaluar në mënyrë të paligjshme, nga Shqipëria për në Greqi dhe e përdori për disa vite të lypte.
“Lokalizohet në Greqi, pas shkëmbimit të informacioneve, kapet dhe vihet në pranga 55-vjeçari i dënuar 15 vjet burgim.
Në vijim të punës për kapjen e shtetasve në kërkim ndërkombëtar, Interpol Tirana, pas marrjes së informacionit nga Seksioni i Kërkimit i DVP Tiranë, për një shtetas shqiptar në kërkim ndërkombëtar që fshihej në Athinë, Greqi, ia kanë dërguar informacionet autoriteteve policore greke, me qëllim lokalizimin dhe kapjen e këtij shtetasi.
Në bazë të informacioneve të dërguara nga Interpol Tirana, në kuadër të operacionit policor të koduar ‘Capital’, është lokalizuar në Athinë, Greqi, është kapur dhe është arrestuar shtetasi shqiptar: Kujtim Demiri, 55 vjeç.
Ky shtetas ishte shpallur në kërkim ndërkombëtar pasi Gjykata e Krimeve të Rënda, në vitin 2010, e ka dënuar me 15 vjet burgim, për veprën penale “Trafikimi i të miturve”, kryer në bashkëpunim.
Shtetasi Kujtim Demiri ka kaluar në mënyrë të paligjshme, nga Shqipëria për në Greqi, një shtetas të mitur dhe nëpërmjet dhunës e ka detyruar atë që të lypë, përreth 1 vit.”, njofton policia.
Vijojnë procedurat për ekstradimin e këtij shtetasi nga Greqia drejt vendit tonë.
