Bajerni vazhdon të ruajë trendin pozitiv në Ligën e Kampionëve rreth fazës së grupeve, e ku numëron 37 ndeshje pa humbje radhazi, e cila zgjat ecurinë e “të pathyeshmit” në këtë raund të Champions-it. Nëse i hedhim një sy kontributit të lojtarëve specifikë përgjatë sezonit aktual, emri i Herri Kejnit gjendet në krye, pavarësisht golave apo asisteve.
TË DHËNAT-
Herri Kejn erdhi me synim të qartë në Mynih, zëvendësimin e golave të Robert Levandovskit, pas dështimit me alternativën Sadio Mane. Në harkun e 12 takimeve, futbollisti me numër “9” në grupin e Tomas Tuhelit ka grumbulluar statistika mbresëlënëse, e përkthyer me 9 gola dhe 6 asiste në të gjitha frontet (Bundesligë, Superkupë e Kupa e Gjermanisë dhe Champions).
Por kjo nuk është e gjitha, edhe pse Robert Levandovski ka lënë gjurmë të thella në shënimin e golave te klubi më i titulluar në Gjermani, Kejn ka “armë” shtesë, e cila koincidon me asiste.
Askush në gjirin aktual të Bajernit s’ia ka dalë të regjistrojë kuotë më të lartë asistesh se Kejni, pavarësisht se Joshua Kimish dhe Xhamal Musiala janë vlerësuar nga analistët e futbollit si “regjisorët” e kampionëve të Bundesligës në ciklin 2023-2024.
Sulmuesi 30- vjeçar ka shërbyer në favor të shokëve plot 6 herë, teksa në spektrin e golave nuk njeh konkurrencë brenda kontingjentit, e përkthyer me 9 finalizime. E gjithë kjo e dhënë është konkluduar në distancën e 978 minutave aktiv në fushën e blertë. Leroi Sane dhe Matis Til janë përpjekur disi t’i qëndrojë afër anglezit në spektrin e golave, respektivisht anësori gjerman me 7 dhe talentit francezi me 6.
PROTAGONIST-
Rekordmenët e Bajernit kanë dalë si fitues në ballafaqimet me kundërshtarë në sezonin e ri 11 herë, e shoqëruar me 1 barazim dhe të njëjtën shifër humbjesh. Mesatarja e golave përkon me 3 finalizime për ndeshje, ekip me “kartat” e duhura për të pretenduar “pushtimin” e të gjithë trofeve të mundshëm. Ama, duhet të theksohet se 38.5% të golave kanë si arkitekt Herri Kejnin. Statistikë, e cila i jep të drejtë të konsiderohet lider absolut.
Sipas raportimeve të mediave pranë bavarezëve dhe deklaratave të Uli Hënesit, shuma e gjigantit nga Mynihu në blerjen e Kejnit qëndron në pragun e 100 milionë eurove, por që mund të rritet me sukseset e mundshme. Pavarësisht rekordit në tregun e transferimeve për të hipotekuar ish-bomberin e Totenhemit, duket se frytet kanë ardhur në kohë fare të shkurtër. Herri ka kontratë me Bajernin deri në verën e vitit 2027 dhe vlerësohet sipas mediumit ekspert të vlerës së lojtarëve “transfermarkt” në 110 milion euro, futbollisti më i shtrenjtë i Bundesligës, së bashku me Xhamal Musialën.
