Ambasadori i OSBE-së në Shqipëri, Bernd Borchardt është shprehur i pakënaqur nga sjellja e partive opozitare të cilat u larguan nga tryeza e thirrur sot nga OSBE për reformën zgjedhore.
I pyetur nëse është i zhgënjyer nga ajo që ndodhi sot tryezë, ambasadori Borchardt tha se, “çfarë do të thotë i zhgënjyer? Jemi në një situatë të vështirë dhe duhet të bëjmë hapa të vegjël. Sigurisht që nuk jam i lumtur. Njerëzit po humbasin mundësitë që iu ofrohen”.
I pyetur se cilat ishin pritshmëritë e tij, Borchardt tha se “njerëzit duhet të qëndronin dhe të dëgjonin ç’ishin për të thënë ata që kemi sjellë këtu”.
I pyetur mbi hapin tjetër, Borchardt tha se, “do ta shohim”.
Në lidhje me propozimin e Partisë Demokratike që të jenë ndërkombëtarët që ta marrin në dorë reformën zgjedhore, ambasadori Borchardt tha se, “nuk e qeverisim ne këtë vend. Ne nuk jemi këtu të zgjedhur nga ju. Por, ne, sigurisht, e mbështesim vendin. Por gjithashtu edhe mes deputetëve të opozitës parlamentare ka pasur debate teksa Rudina Hajdari kundërshtoi deputetin Ralf Gjoni duke i thënë të mos bëjë show mediatik”./ATSH/
