Kryeministri i Britanisë së Madhe, Boris Johnson, i ka prezantuar masat e reja kufizuese pas rritjes së numrit ditor të rasteve të koronavirusit në këtë shtet. Sipas tij, masat e reja mund të mbeten në fuqi për gjashtë muaj.
Përmes një deklarate, shefi i qeverisë britanike paralajmëroi se Mbretëria e Bashkuar është në një pikë kthese të rrezikshme dhe se njerëzit nuk duhet të jenë të vetëkënaqur, shkruan The Guardian.
Masat e reja të qeverisë britanike janë këto:
1. Punëtorët që punojnë në zyra duhet të punojnë nga shtëpia.
2. Nga e enjtja, restorantet dhe kafenetë duhet të ofrojnë shërbime në tavolinë, me përjashtim të marrjes së ushqimit me vete, dhe duhet të mbyllën në orën 22.
3. Përdorimi i maskave do të jetë i detyrueshëm për stafin e gastronomisë në mjedise të mbyllura, shitësit e shitoreve me pakicë dhe për pasagjerët në taksi.
4. Lokalet e akomodimit janë të detyruara t’i respektojnë masat e distancës sociale.
5. Vendet e punës duhet të jenë të siguruara për ta shmangur rrezikun e infektimit me koronavirus.
6. Nga e hëna, numri më i madh i lejuar i dasmorëve në një dasmë do të jetë 15, ndërsa më parë kjo shifër ishte 30.
7. Sportet që luhen në hapësira të mbyllura do të ndalohen, kurse nga 1 tetori do të pezullohen planet për kthimin e pjesshëm të tifozëve në stadiume.
8. Do të dyfishohet gjoba për mosvendosje të maskës dhe shkeljes së “rregullës së gjashtëshit”, nga 100 në 200 funte.