Një grup i strukturuar kriminal i trafikut të drogës, të cilët raportohet se janë me kombësi shqiptare si dhe operonin në gjithë Katalonjën, është shkatërruar nga policia spanjolle.
Mëngjesin e të mërkurës (27 shtator) Gardës Civile kreu një mega operacion në komuna të ndryshme si Terragona e Barcelonë, me qëllim shkatërrimin e strukturave kriminale të një grupi të organizuar që trafikonte drogë.
Në kuadër të këtij operacioni deri më tani janë bërë 21 arrestime, ku rreth 15-20 prej tyre janë shqiptarë.
Në këtë operacion, morën pjesë 220 agjentë të Gardës Civile. Me përfundimin e kërkimeve, strukturat e Policisë kanë shkatërruar tetë plantacione shumë të sofistikuara ku kultivohej marijuanë, shkruajnë mediat spanjolle.
Plantacionet ndodhen në ndërtesa industriale dhe vila dhe janë shumë të mbrojtura.
Burimet policore bëjnë me dije se kanë gjetur kamera të shumta sigurie, madje edhe sensorë lëvizjeje që lajmërojnë bandën për çdo prani në afërsi.
Janë sekuestruar gjithashtu, armë të cilat u gjetën në një shtëpi në komunën e Cambrils.
Prezenca e shqiptarëve në kultivimin e marijuanës ka ardhur vazhdimisht në rritje në Katalonjë vitet e fundit.
Fillimisht e kanë nisur “punën” duke ruajtur dhe korrur bimët narkotike të mbjella në kushte jo dinjitoze.
Por me kalimin e kohës, disa kanë arritur të krijojnë dhe udhëheqin organizatat e tyre kriminale.
Bosët e rinj të marihuanës punësohen dhe trajtohen nga bashkatdhetarët si skllevër, të cilët në shumë raste merren nga Shqipëria në Spanjë përmes mashtrimit.
