Me mijëra boshnjakë janë nisur të enjten për t’i ripërshkuar hapat e fundit të viktimave të gjenocidit të Srebrenicës më 1995, gjatë luftës në Bosnjë-Hercegovinë.
Më shumë se 8 mijë burra dhe djem boshnjakë janë vranë në masakrën më të rëndë në Evropë që nga Lufta e Dytë Botërore, pasi forcat serbe të Bosnjës e morën nën kontroll qytetin.
Shumë prej atyre ishin përpjekur që të iknin, nën vapën e madhe dhe pa ushqim e ujë, porse ishin zënë në pritë përgjatë shtigjeve malore të qytetit. Ata ose u qëlluan në vend, ose u dërguan në vendet e ekzekutimit, dhe më pas u varrosën në varreza masive.
Që nga viti 2004, përpara përvjetorit të masakrës me mijëra qytetarë nga Bosnja dhe shumë të huaj mblidhen për ta ripërshkuar rrugëtimin e tyre të fundit dhe për të mbërritur në Srebrenicë në kohën e ceremonisë vjetore të përkujtimit, më 11 korrik. Të mbijetuarit e masakrës shpeshherë i bashkohen marshimit.
Deri më tani, eshtrat e më shumë se 6 mijë e 600 viktimave të të zhvarrosurve nga varrezat masive janë identifikuar. Në përvjetorin e sivjetmë mbetjet mortore të edhe 19 viktimave të porsaidentifikuara do të varrosen në qendrën përkujtimore në Srebrenicë.
