Sot e gjithë vëmendja do të jetë në Wembley aty ku kombëtarja shqiptare do të bëjë debutimin në eliminatoret e botërorit 2026.
Kuqezinjtë përballen me gjigandët anglez për të thyer tabunë dhe për rezultatin historik. Përfaqësuesja shqiptare nuk e ka mundur asnjëherë kombëtaren ishullore dhe në të 6 ndeshjet që kanë luajtur janë mundur 6 herë. Megjithatë sot në mbrëmje nuk ka asgjë për të humbur.
Shqipëria do të zbres në fushë duke lënë në një anë presionin dhe për të nisur në mënyrën më të mirë këto kualifikuese. Kuqezinjtë mbyllën përgatitjet mbrëmjen e të enjtes ku sërish dy emrat që shqetësojnë teknikun Silvinjo mbeten dy qendërmbrojtësit Ardian Ismajli dhe Marash Kumbulla. Edhe këtë herë dy futbollistët shqiptar u stërviten të diferencuar nga pjesa tjetër e skuadrës dhe vështirë se do të jenë në formën më të mirë për trajnerin brazilian që i shtohen dhimbjet e kokës në repartin e mbrojtës.
Sa i përket pjesës tjetër të ekipit, të gjithë janë në formë të mirë fizike dhe gati për tu përballur me gjigandët anglezë.
Ndeshje në Londër do të jetë debutuese për kuqezinjtë në kualifikueset e botërorit 2026. Dueli Angli- Shqipëri do të luhet në orën 20:45 në stadiumin e Wembley.
