Parku Kombëtar “Bredhi i Hotovës-Dangëlli” është një destinacion turistik gjithëvjetor për qarkun e Gjirokastrës.
Ky park ofron peizazhe fantastike natyrore, me pyje të larta të bredhit të Maqedonisë, peizazhe të mrekullueshme, kanione të mahnitshme, kulturë të lartë dhe histori të lashtë.
Drejtori i Administratës së Zonës së Mbrojtur Gjirokastër, Gligor Dushi tha sot për ATSH-në se “nga janari deri në tetor ky park u vizitua nga 4900 turistë gjithsej, nga të cilët rreth 400 të huaj”.
Sipas tij, vizitorët përveç përjetimit të bukurive të natyrës gjatë stinës së vjeshtës, për të vizituar fshatrat karakteristike dhe monumentet e kulturës kanë shijuar edhe udhëtimet me kuaj.
Dushi shton se shtegu më i preferuar nga turistët mbetet ai përgjatë kanionit të Lengaricës.
“Ky është një shteg i vjetër që shumë vite më parë lidhte disa fshatra të zonës”, tha Dushi.
Bredhi i Hotovës është Park Kombëtar, ndodhet në jug të Shqipërisë, pak kilometra nga qyteti i Përmetit dhe mund të cilësohet si mushkëria natyrore e Shqipërisë Jugore.
Me një shtrirje prej 1200 hektarësh dhe një masiv të mrekullueshëm të përbërë kryesisht nga Bredhi Maqedonas, ky Park Kombëtar është një nga perlat turistike të Shqipërisë, që ofron surpriza të këndshme në çdo stinë të vitit, si në dimër, ku ai është i mbuluar nga dëbora, por dhe në verë ku mund të shijosh freskinë e tij.
Pamja madhështore e parkut të shfaqet nga hyrja e luginës së Lumicës e deri afër majës së malit të Kokojkës. Bredhi i Hotovës konsiderohet një nga reliket bimore mesdhetare më të rëndësishme në vend dhe është një nga parqet më të mëdhenj në Ballkan me Bredh Maqedonas./ATSH/
