Një operacion pastrimi është duke u zhvilluar përgjatë brigjeve të Anglisë jugore, pasi sasi të mëdha bananesh kanë dalë në breg pas humbjes së disa kontejnerëve nga anija e mallrave Baltic Kipper.
Sipas Rojës Bregdetare Britanike, anija humbi 16 kontejnerë të shtunën, përfshirë tetë që transportonin banana dhe dy të tjera me fruta të ndryshme ekzotike.
Autoritetet lokale, së bashku me një kompani të specializuar në menaxhimin e emergjencave mjedisore, po punojnë për të siguruar kontejnerët e mbetur dhe për të mbledhur mbeturinat që janë shpërndarë në bregdet.
Shumica e mbetjeve përbëhet nga fruta dhe polistiren, të cilat janë shpërndarë në distanca të gjata përgjatë vijës bregdetare.
Në plazhin Selsey, vullnetarët u mobilizuan menjëherë, duke mbledhur qese të tëra me banane të hedhura në breg, vetëm pak metra larg kontejnerëve të përmbysur.
Ndërkohë, autoritetet u kanë bërë thirrje qytetarëve të mos konsumojnë frutat e gjetura në bregdet, duke paralajmëruar se ato mund të jenë të kontaminuara ose të pasigurta për konsum.
