Gjatë 24 orëve të fundit, 621 persona kanë vdekur nga koronavirusi në Britani të Madhe. Kështu, shifra e përgjithshme e viktimave shkoi në 4,934 persona.
Viktima më e re ishte në moshën 33-vjeçare, ndërsa më e vjetra 103-vjeçare. 29 nga viktimat nuk kishin probleme të tjera shëndetësore të vërtetuara, shkruan “Daily Mail”.
Vetëm në Angli u shënuan 555 të vdekur, prej të cilëve 174 në Londër. Ministri britanik i shëndetësisë, Matt Hancock, i ka kritikuar ata që po dalin në hapësira publike për t’i shfrytëzuar rrezet e diellit për zbavitje në këtë kohë krize.
Ai tha se është goxha e pabesueshme që disa njerëz ende nuk po i respektojnë udhëzimet e qeverisë për të qëndruar në shtëpi, duke e përsëritur këtë kërkesë për të gjithë.
Ministri britanik paralajmëroi se vendi i tij do ta ndjekë shembullin e shumë shteteve të tjera, të cilat i kanë ndaluar ushtrimet fizike në natyrë, nëse populli vazhdon të mos i respektojë udhëzimet e qeverisë.
Britania është ndër shtetet evropiane me më së shumti infektime dhe viktima të koronavirusir, pas Italisë, Spanjës dhe Francës.
