Sekretari i Shëndetësisë në Britaninë e Madhe, Sajid Javid, ka njoftuar se, ata që kanë marrë të dyja dozat e vaksinës, ose nëse janë nën moshën 18 vjeç dhe kanë pasur kontakt me persona që kanë rezultuar pozitivë me COVID-19, nuk do të duhet të vetizolohen.
Ky rregull do të hyjë në fuqi nga 16 gushti. “Të rriturit do të duhet të kenë bërë vaksinimin e tyre të dytë, të paktën 10 ditë më para”, tha sekretari shëndetësor para deputetëve.
Njoftimi erdhi një ditë pasi Boris Johnson njoftoi lëvizjen e pritur drejt hapjes pothuajse të plotë në Angli, duke filluar nga 19 korriku. Kjo përfshin përfundimin e përdorimit të detyrueshëm të maskës dhe distancimit social dhe çdo kufizim në industrinë e shërbimit dhe argëtimit.
Të martën, Gavin Williamson, sekretari i Arsimit, pritet të njoftojë ndryshimet në rregullat e vetizolimit për nxënësit e shkollës.
Në intervistat për mediat më herët gjatë ditës, Javid tha se hapja e vendit mund të rezultojë në ngritjen e numrit të infeksioneve me COVID, që do ta fuste vendin në një “territor të paeksploruar”.
