Një grua e zhdukur 52 vjet më parë është gjetur e gjallë dhe shëndoshë e mirë, pasi Policia publikoi një fotografi si pjesë e një apeli, duke zgjidhur një nga rastet më të gjata të personave të zhdukur në Britani.
Sheila Fox, tani 68 vjeç, u zhduk nga Coventry në vitin 1972 kur ishte 16 vjeç. Në atë kohë, policia e West Midlands tha se ajo kishte jetuar me prindërit e saj dhe mund të kishte qenë në një lidhje me një burrë. Oficerët thanë se ajo mund të ishte larguar nga zona.
Të dielën, policia e West Midlands nisi një apel të ri për të ndihmuar në gjetjen e Fox-it, duke publikuar një fotografi të Fox nga koha e zhdukjes së saj në uebsajtin e tyre dhe mediat sociale.
Brenda pak orësh nga publikimi, oficerët e Policisë konfirmuan se Fox ishte gjallë dhe mirë. Ata thanë se ajo jetonte në një pjesë tjetër të vendit.
Një zëdhënës i Policisë tha: Ne jemi të kënaqur të njoftojmë përfundimin e një prej hetimeve më të gjata të policisë së West Midlands për personat e zhdukur.
“Një foto e vetme e Sheilës nga koha e zhdukjes së saj u gjet nga oficerët që po hetonin dhe u publikua në faqen tonë të internetit dhe mediat sociale. Brenda disa orësh pas apelit, anëtarët e publikut ranë në kontakt me informacionin që e çoi ekipin tek ajo”.
Jenna Shaw, nga ekipi i hetimit të rastit të tejzgjatur, tha: “Ne kërkuam çdo provë që mundëm të gjenim dhe arritëm të gjenim një foto të Sheila-s.
Çdo person i zhdukur ka një histori dhe familjet dhe miqtë e tyre meritojnë të dinë se çfarë ka ndodhur me ta dhe, shpresojmë, të ribashkohen me ta”.
