Mbretëria e Bashkuar ka përjetuar një rënie të paprecedentë prej 50% të imigracionit neto në vitin 2024, sipas të dhënave zyrtare të publikuara nga Zyra për Statistikat Kombëtare (ONS).
Raporti vjetor evidenton një ulje të fluksit migrator nga 860,000 në vitin 2023, në 431,000 persona gjatë vitit të kaluar, shifër që po përdoret politikisht si sukses nga të dyja palët kryesore politike në vend: Partia Laburiste dhe ajo Konservatore.
Kjo rënie e ndjeshme vjen në një vit të ngarkuar politikisht, ku pushteti u nda mes dy partive kryesore.
Deri në zgjedhjet e parakohshme të 7 korrikut, qeveria konservatore e drejtuar nga Rishi Sunak aplikoi një sërë politikash kufizuese, përfshirë rritjen e pragut të pagës për punëtorët e huaj të kualifikuar dhe pengesat për studentët dhe punëtorët që donin të sillnin familjet me vete.
Më pas, qeveria kaloi në duart e laburistëve nën drejtimin e Keir Starmer, i cili ka ruajtur një vijë të fortë mbi çështjet e migracionit.
Ekspertët e ONS theksojnë se frenimi i imigracionit është ndikuar kryesisht nga ulja e dhënies së vizave për punë dhe studim, një politikë që ka ndikuar ndjeshëm sidomos pas Brexit. Megjithatë, zërat kritikë paralajmërojnë se këto masa mund të kenë pasoja të rënda për ekonominë britanike.
Britania përballet me një krizë të dyfishtë: plakjen e popullsisë dhe mungesën e fuqisë punëtore të kualifikuar në sektorë kyç si shëndetësia, ndërtimi dhe teknologjia.
Ekspertë të pavarur kanë paralajmëruar se nëse flukset migratore vazhdojnë të kufizohen, vendi rrezikon të përballet me ngadalësim ekonomik ose recesion.
Ndërkohë, rënia e migracionit është përdorur si trampolinë politike nga krahu i djathtë radikal.
Partia Reformiste, e udhëhequr nga figura e njohur e Brexit, Nigel Farage, ka shënuar rritje të ndjeshme në sondazhe dhe në zgjedhjet lokale të fundit. Kjo e ka kthyer partinë nga një forcë proteste në një konkurrente serioze në skenën kombëtare. Syri.net-Kathimerini
