Në hetimin e kryer nga Ofcom, është konkluduar se kompania Star China Media Limited (SCML), e cila mban licencën e CGTN-së, nuk ka përgjegjësi editoriale në transmetimet e CGTN-së
Londër
Autoriteti britanik i mbikëqyrjes së mediave, Ofcom, njoftoi se licenca e transmetimit e Rrjetit Global Televiziv Kinez (CGTN) që transmeton në gjuhën angleze në vend është anuluar.
Në hetimin e kryer nga Ofcom, është konkluduar se kompania Star China Media Limited (SCML), e cila mban licencën e CGTN-së, nuk ka përgjegjësi editoriale në transmetimet e CGTN-së.
Në deklaratën e bërë nga Ofcom, thuhet se SCML nuk plotëson kërkesat ligjore të “të pasurit kontroll mbi shërbimet e licencuara” në vend dhe për këtë arsye nuk zotëron licencë për transmetim të ligjshëm.
Deklarata thekson se kanalit CGTN i është dhënë kohë e mjaftueshme për të përmbushur kërkesat ligjore.
“Ne vendosëm të anulojmë licencën e transmetimit të CGTN-së në Mbretërinë e Bashkuar si rezultat i vlerësimit tonë, duke marrë parasysh edhe të drejtat e lirisë së shprehjes së transmetuesit dhe audiencës”, thuhet më tej.
Ofcom po ashtu tha se po vazhdon edhe procesi i vendosjes së sanksioneve ndaj CGTN-së për shkak të shkeljes së rregullave të paanësisë dhe konfidencialitetit në transmetimet në lidhje me protestat e mbajtura në Hong Kong vitin e kaluar.
Ofcom nisi tre hetime ndaj CGTN-së në korrik të vitit të kaluar me arsyetimin se ka shkelur rregullat e paanësisë dhe ka publikuar rrëfime të bëra nën presion në lajmet e saj.
Publikimi nga CGTN i rrëfimeve të gazetarit britanik Peter Humphrey të bëra nën presion ishte konsideruar nga gjykata si shkelje e rregullave editoriale të Britanisë dhe ishte njoftuar se kanali do të përballej me sanksione të rrepta.
