Ministri britanik i Punëve të Jashtme, Jeremy Hunt, ka thënë se anija iraniane, që është konfiskuar nga forcat e Britanisë në Ngushticën e Gjibraltarit, do të lirohet nëse merren garanci se karburantet nuk do të dërgohen në Siri.
Ministri Hunt tha në Twitter se e ka zhvilluar një bisedë konstruktive përmes telefonit me homologun e tij iranian, Javad Zarif, gjatë së cilës ai e siguroi Zarifin se shqetësimi i Britanisë së Madhe nuk ka të bëjë me prejardhjen e naftës, por me destinacionin e fundit të saj.
Ai tha se Britania do ta mundësojë lirimin e anijes, nëse marrin garanci se nafta nuk do të dërgohet në Siri. Hunt shtoi se procesi i lirimit do të ndodhte pas proceseve gjyqësore në gjykatat e Gjibraltarit.
Dyshohet që kjo anije i ka shkelur sanksionet e Bashkimit Evropian ndaj presidentit sirian, Bashar al Assad. Policia e Gjibraltarit i ka arrestuar kapitenin dhe shefin e ekuipazhit të kësaj anije. Ata po mbahen në paraburgim dhe po merren në pyetje nga policia.
Tensionet mes Britanisë së Madhe dhe Iranit u rritën të enjten pasi forcat detare britanike thanë se tri anije paramilitare iraniane e kanë penguar qarkullimin e një anije britanike që po transportonte naftë nëpër Ngushticën e Hormuzit, shkruan “Fox News”.
