Lavazhët e makinave dhe sallonet e bukurisë do të jenë në shënjestër të oficerëve të imigracionit në Britaninë e Madhe, ka njoftuar sekretarja e Brendshme.
Duke shkruar në gazetën “Sun”, Yvette Cooper tha se zyrtarët britanikë janë të vendosur për të kontrolluar bizneset e dyshuara për punësimin e punëtorëve të paligjshëm.
Yvette Cooper tha se ishte “e tronditur kur zbuloi” se 1000 nëpunës civilë kishin punuar në një plan për të dërguar emigrantë në Ruandë.
Skema e Ruandës, një politikë kryesore nën qeverinë e fundit konservatore, u shfuqizua nga laburistët brenda disa ditësh pasi Sir Keir Starmer fitoi zgjedhjet e përgjithshme.
“Ne kemi udhëzuar Forcat e Emigracionit që të intensifikojnë operacionet e tyre gjatë verës, me fokus te punëdhënësit që po nxisin tregtinë e bandave kriminale duke shfrytëzuar dhe lehtësuar punën e paligjshme këtu në Mbretërinë e Bashkuar – duke përfshirë në lavazhe dhe në sektorin e bukurisë”, tha Cooper.
Kryeministri britanik përdori gjithashtu samitin e Komunitetit Politik Evropian të kësaj jave për të diskutuar mbi migrimin me liderët e tjerë evropianë dhe sinjalizoi se do të ishte i hapur për të shqyrtuar marrëveshjet e përpunimit në det të hapur të ngjashme me atë midis Italisë dhe Shqipërisë.
Por ai është kritikuar nga konservatorët për heqjen e skemës së Ruandës në ditën e tij të parë në detyrë, tekas kundërshtarët argumentojnë se ajo ofronte një pengesë të madhe për ata që kërkojnë të bëjnë kalimin ilegal.
