Britania e Madhe dhe Bashkimi Evropian kanë arritur një marrëveshje post Brexit për rregullat e tregtisë në Irlandën Veriore. Lajmin e raporton The Guardian duke cituar burime nga qeveria britanike.
Kujtojmë se presidentja e Komisionit Evropian Ursula von der Leyen ka mbërritur në Britaninë e Madhe të hënën për bisedimet përfundimtare me kryeministrin britanik Rishi Sunak, përpara një deklarate për marrëveshjen.
Von der Leyen do të takohet gjithashtu me Mbretin Charles III për çaj në Kështjellën Windsor.
Negociatat u intensifikuan javët e fundit, pas muajsh ngërçi mbi mënyrën e trajtimit të kontrolleve kufitare në Irlandën e Veriut, e cila është pjesë e Britanisë së Madhe, por ndan një kufi tokësor me Republikën e Irlandës, një vend anëtar i BE-së.
Tani që është arritur një marrëveshje, Sunak mund të përballet me një reagim politik nga Euroskeptikët e linjës së ashpër në Partinë e tij Konservatore.
