Kryeministri britanik Sir Keir Starmer njoftoi se qeveria nuk do të lehtësojë rregullat e vizave për Indinë, gjatë një vizite dyditore në Mumbai, ku po udhëheq një delegacion prej 125 drejtuesish biznesi, sipërmarrës dhe rektorë universitetesh.
Kjo është misioni i parë i plotë tregtar i Britanisë në Indi që nga koha e kryeministres Theresa May, dhe synon forcimin e marrëdhënieve ekonomike mes dy vendeve. Starmer do të takohet të enjten me kryeministrin indian Narendra Modi, pesë muaj pas nënshkrimit të marrëveshjes së parë tregtare mes dy vendeve pas Brexit-it.
Megjithëse marrëveshja ende nuk është zbatuar plotësisht, dhe diskutimet për heqjen e sigurimeve shoqërore për punëtorët indianë që vijnë në Britani vazhdojnë, Starmer nuk pranoi të rrisë numrin e vizave.
Ai theksoi se fokusi duhet të jetë në bashkëpunimin mes bizneseve dhe investimet, jo në vizat. “Situata e vizave nuk ka ndryshuar me marrëveshjen tregtare, ndaj nuk kemi hapur më shumë viza,” tha ai.
Kryeministri gjithashtu shmangu pyetjet lidhur me përkrahjen e kryeministrit Modi ndaj presidentit rus Vladimir Putin, duke theksuar se nuk ka uruar Putinin për ditëlindje dhe se Britania po punon për të ndaluar përdorimin e energjisë ruse.
