Britania e Madhe po zhvillon me shpejtësi plane për të përgatitur të gjithë vendin për mundësinë e një lufte, ka deklaruar ministri i Forcave të Armatosura, Al Carns, duke paralajmëruar se rreziku i një konflikti të madh në Evropë po bëhet gjithnjë e më real.
“Ushtritë, flotat dhe forcat ajrore reagojnë ndaj krizave, por luftërat fitohen nga shoqëritë, industria dhe ekonomitë”, tha Carns, duke theksuar se edhe civilët do të kenë një rol kyç në çdo konflikt të ardhshëm.
Sipas tij, “hija e luftës po troket sërish në derën e Evropës”.
Deklaratat vijnë në një klimë të tensionuar sigurie, pasi Sekretari i Përgjithshëm i NATO-s, Mark Rutte, u bëri thirrje vendeve aleate të përgatiten për një përballje me Rusinë në përmasa të krahasueshme me luftërat botërore.
Paralelisht, autoritetet britanike kanë bërë të ditur se aktivitetet armiqësore të inteligjencës kundër Forcave të Armatosura dhe Ministrisë së Mbrojtjes janë rritur me mbi 50 për qind gjatë vitit të fundit.
Si përgjigje, qeveria britanike po krijon një njësi të re kundër-inteligjence dhe po ristrukturon shërbimet ushtarake të zbulimit, duke bashkuar degët e inteligjencës së ushtrisë, marinës dhe forcave ajrore në një organizëm të vetëm: Shërbimet e Inteligjencës Ushtarake.
Por përgatitja, sipas Carns, nuk kufizohet vetëm te ushtria. Qeveria po punon me Kabinetin dhe institucionet civile për të përcaktuar rolin e çdo sektori të shoqërisë në rast krize, nga infrastruktura kritike te mbrojtja e territorit kombëtar.
Britania dikur kishte një plan të detajuar për kalimin nga paqja në luftë, të njohur si “Government War Book”, që përfshinte udhëzime për çdo aspekt të jetës publike. Sot, Londra duket se po rikthehet te e njëjta logjikë: përgatitje e gjithanshme për skenarin më të keq.
