Mijëra adhurues të muzikës janë bërë të parët në Britani të Madhe që kanë vallëzuar në një klub nate në kohë pandemie, si pjesë e testit për të parë nëse masat e distancës mund të lehtësohen pa e nxitur përhapjen e koronavirusit. Një depo e madhe në Liverpool ishte nikoqire e një prej tubimeve më të mëdha në kohë pandemie.
Ky aheng i madh është sponsorizuar nga qeveria britanike dhe është mbikëqyrur nga zyrtarët e shëndetit publik.
Tre mijë pjesëmarrësit, të gjithë banorë të Liverpoolit, janë testuar para dhe pas ahengut, teksa hulumtuesit do ta studiojnë kualitetin e ajrit dhe lëvizjen gjatë ahengut.
Dy ahengje të tjera pritet të mbahen gjatë të shtunës dhe së dielës.
Të shtunën mbrëma në një koncert do të marrin pjesë 5 mijë veta. Faza testuese do të kulmojë më 15 maj, kur në stadiumin e Wembleyt do të jenë të pranishëm 21 mijë shikues për finalen e Kupës FA.
Fushata e suksesshme e vaksinimit ka shtyrë qeverinë që t’i lirojë shumicën e masave që kanë qenë në fuqi në 14 muajt e fundit. Dyqanet janë hapur, por gastronomia në hapësira të mbyllura nuk do të hapet deri më 17 maj.
