Agjencia Rregullatore e Barnave dhe Produkteve Shëndetësore të Britanisë së Madhe(MHRA) njoftoi sot se ka miratuar ilaçin oral antiviral Covid-19 të Pfizer, ‘Paxlovid’, për personat e infektuar me Covid-19 me simptoma të lehta, përbëjnë rrezik të lartë për zhvillimin e rasteve të rënda.
‘Paxlovid’ është një ilaç antiviral i përbërë nga një kombinim i përbërësve aktivë, PF-07321332 dhe ‘Ritonavir’ që vepron duke frenuar një proteazë të nevojshme për riprodhimin e virusit. Ilaçi është autorizuar për përdorim te personat e moshës 18 vjeç e lart, të cilët kanë infeksione të lehta deri në mesatare dhe që janë faktor rreziku për zhvillimin e sëmundjes së rëndë.
Faktorë të tillë rreziku përfshijnë personat në moshën më të madhe (60 vjeç e lart), që vuajnë nga obeziteti, diabeti mellitus ose sëmundjet e zemrës.
Në një klinikë ku kryhen studime, gjatë një trajtimi pesëditor të ‘Paxlovid’, rreziku i shtrimeve në spitale dhe vdekjeve lidhur me Covid-19 brenda 28 ditëve, u reduktua me 89 për qind.
Bazuar në të dhënat e provës klinike, ‘Paxlovid’ është më efektiv kur merret në fazat e hershme të infeksionit. MHRA rekomandon përdorimin e tij sa më shpejt të jetë e mundur dhe brenda pesë ditëve nga fillimi i simptomave.
MHRA tha se është shumë herët për të ditur nëse ‘Paxlovid’ do të jetë efikas ndaj variantit Omicron.
