Britania e Madhe ka vendosur ndalimin e udhëtimit të personave nga Danimarka për shkak të një mutacioni të ri të virusit. Në Danimarkë është shfaqur një lloj i ri koronavirusi që është përhapur tek njerëzit nga vizoni, një lloj kafshe e së njëjtës familje me nuselalën.
Ndërsa shtetasit britanikë që ndodhen në Danimarkë do të lejohet të kthehen në Britani, por do të duhet që të karantinohen për 14 ditë së bashku me të gjithë anëtarët e familjes.
Ministri britanik i Transportit njoftoi këtë rregull të ri përmes një postimi në Twitter ku shkruante: “Ky vendim për të vepruar sa më shpejt vjen pasi autoritetet shëndetësore në Danimarkë njoftuan përhapjen e koronavirusit nga vizoni. Përparësia jonë kryesore është siguria e qytetarëve të Mbretërisë së Bashkuar”.
Autoritetet në Britani të Madhe do të kontaktojnë të gjithë qytetarët britanikë që kanë qenë në Danimarkë gjatë dy javëve të fundit dhe do të udhëzohen që të vetëizolohen.
Për shkak të përhapjes së këtij mutacioni të ri të virusit, Danimarka është vendosur në listën e vendeve ku ndalohet udhëtimi. Edhe shtetasit e huaj që do të kalojnë tranzit në Britani nga Danimarka, nuk do të lejohen të udhëtojnë drejt shtetit ishullor.
Më shumë se 200 persona janë raportuar të infektuar në Danimarkë nga mutacioni i virusit që transmetohet tek njerëzit nga vizoni. Virusi është përhapur nga një fermë me këto kafshë dhe janë infektuar punëtorët. /tvklan.al
