Fluturimet e para për kthimin e emigrantëve klandestine nga Britania në Francë pritet të nisin javën e ardhshme, si pjesë e marrëveshjes së re mes dy vendeve, raporton BBC.
Skema pilot “një brenda, një jashtë” u arrit në korrik nga kryeministri Sir Keir Starmer dhe presidenti francez Emmanuel Macron gjatë vizitës shtetërore në Londër.
Dhjetëra migrantë u ndaluan muajin e kaluar në Dover dhe tashmë kanë marrë njoftimin zyrtar se do të deportohen brenda pesë ditësh. Në këmbim, Britania do të pranojë një numër të barabartë azilkërkuesish nga Franca, që nuk kanë tentuar kalimin dhe që kalojnë kontrollet e sigurisë.
Starmer e quajti marrëveshjen “produkt i diplomacisë së pjekur” që do të “sjellë rezultate reale”, ndërsa kritikët konservatorë e kanë cilësuar planin si “të pazbatueshëm dhe të hapur për abuzime”.
Sipas marrëveshjes së publikuar më 4 gusht, Franca pranon kthimin e të rriturve dhe fëmijëve të shoqëruar që kanë kaluar me gomone, pasi kërkesa e tyre për azil të jetë hequr ose shpallur e papranueshme. Qëllimi është që transferimet të kryhen brenda tre muajsh nga hyrja e tyre në Mbretërinë e Bashkuar.
Qeveria ka publikuar edhe detaje për mënyrën se si njerëzit do të aplikojnë nga Franca për të ardhur ligjërisht në Britani – fillimisht me leje qëndrimi 3-mujore për të “rregulluar statusin e tyre”. Kostot e transportit për migrantët që kthehen dhe ata që pranohen në Britani do të mbulohen nga qeveria britanike.
Ky është një nga një sërë masash të reja për të frenuar kalimet me gomone. Vetëm këtë vit, deri më 13 shtator, 31,027 persona kanë kaluar Kanalin Anglez – më shumë se në të njëjtën periudhë të 2024.
Qeveria ka ngrirë asetet e 25 personave të përfshirë në trafikimin e migrantëve, ka shtuar 300 oficerë të Agjencisë Kombëtare të Krimit dhe po krijon një Komandë të Sigurisë Kufitare për të koordinuar policinë, emigracionin dhe shërbimet e inteligjencës.
