Një burrë përplasi makinën e tij në portën e një zyre të FBI-së në Pittsburgh, Pensilvani, herët të mërkurën dhe më pas u largua nga vendi i ngjarjes, në atë që hetuesit po e shohin si një “akt terrori”. Nuk pati raportime për lëndime.
FBI e identifikoi të dyshuarin si Donald Henson nga Penn Hills. Ai nuk besohet të jetë i armatosur, tha FBI, por ai ka një histori problemesh të shëndetit mendor, kështu që e konsiderojnë të rrezikshëm. FBI tha gjithashtu se Henson mendohet të jetë një ish-anëtar i ushtrisë.
Ndihmës agjenti special i FBI-së në Pittsburgh, Christopher Giordano, tha se Henson kishte rrëmbyer një flamur amerikan nga brenda makinës dhe e kishte hedhur mbi portën me të cilën sapo ishte përplasur.
“Ne e shohim këtë si një akt terrori kundër FBI-së”, tha Giordano, duke i kërkuar kujtdo që ka informacion në lidhje me Henson të kontaktojë 911.
“Ky ishte një sulm i synuar në këtë ndërtesë. Për fat të mirë, askush nuk u lëndua, por ne do të shterojmë çdo mundësi që kemi sipas ligjit federal për të gjetur, kapur dhe ndjekur penalisht këtë subjekt në masën më të plotë”, u tha ndër tjera.
Giordano tha se Henson kishte ardhur në zyrën e FBI-së disa javë më parë për të bërë një ankesë që “nuk kishte shumë kuptim” dhe, pasi e shqyrtuan atë, hetuesit “e kontaktuan dhe e njoftuan se nuk kishte asnjë krim federal që ne ishim në gjendje ta akuzonim”.
Pamjet e transmetuara nga CBS treguan një limuzinë me ngjyrë të çelët, derën e shoferit hapur, përpara një porte metalike të zezë të dëmtuar, të ngritur në njërën anë, por që ende bllokonte hyrjen. Një flamur amerikan dukej se ishte vendosur në portë.
Duket se kishte një mesazh të shkruar në njërën nga dritaret e makinës, tha Giordano, dhe skuadra e deminimit është thirrur për të kontrolluar automjetin.
