Ish-deputeti i PD-së Oerd Bylykbashi ka reaguar sot për zgjatjen e gjendjes së jashtëzakonshme deri më 23 qershor duke e konsideruar antikushtetuese dhe të pajustifikueshme për shifrat e epidemisë në Shqipëri.
“Të gjitha vendet e tjera që sot kanë kriza të vërteta shëndetësore me qindra-mijëra të sëmurë e dhjetëra-mijëra të vdekur si Italia, Britania, Gjermania, Franca dhe SHBA, e kanë deklaruar zgjatjen maksimumi nga 3–11 maj. Ka shumë që kundërshtojnë këto zgjatje masash, madje në SHBA ka protesta të mirëfillta në rrugë”, u shpreh Bylykbashi.
Bylykbashi shprehet se shifrat e ulëta të të infektuarve nuk e justifikojnë shtyrjen e gjendjes së jashtëzakonshme.
“Sigurisht kushdo, e kupton që nëpër rrugë, në tregje, supermerkata, vende pune, por dhe në familje, virusi bredh lirisht dhe zgjatja duhet. Por shifrat e Edi Ramës, 609 të identifikuar me virus dhe 26 të vdekur, nuk e justifikojnë aspak zgjatjen deri në qershor kur të tjerët me kriza të vërtetë shëndetësore po i zgjasin vetëm 3-4 javë. Por çështja nuk është nëse duhet zgjatur apo jo. Çështja është, a ka Kryeministri të drejtë të propozojë një zgjatje sa i teket qejfi dhe Parlamenti ta miratojë kërkesën për kufizim?”, shprehet ai.
Sipas Bylykbashit, zgjatja e gjendjes së jashtëzakonshme më shumë se 30 ditë është antikushtetuese.
“Afati fillestar që parashikon Kushtetuta është 30 ditë dhe shtesa nuk mund të jetë më e gjatë se afati fillestar. Kushtetuta detyron që të merren masa të jashtëzakonshme që fatkeqësia natyrore, qofte edhe pandemia, të përballën sipas afateve. Nëse nuk mjafton, qeveria të kërkojë në Parlament zgjatje tjetër 30-ditore, e po nuk mjaftoi shtesa e parë, të arsyetojë dhe kërkojë një tjetër. Afati shërben edhe që të matet efikasiteti i masave. Ndërkohë të mos harrojmë se janë kufizuar te drejta e liri themelore kushtetuese për shkak të gjendjes së jashtëzakonshme, e para liria e lëvizjes. Nëse do te kishim mburojën imunitare kushtetuese, Gjykatën Kushtetuese, sot do e vendoste ajo nëse Rama, nën pretekstin e koronavirusit, mund të zgjasë gjendjen e jashtëzakonshme dhe kufizimin e lirive të shqiptarëve aq sa i leverdis pushtetit të tij edhe pse statistikat nuk e justifikojnë”, tha ai.
