Praga do të ndalojë përdorimin e monopatinave elektrike nga janari i vitit të ardhshëm. Ky vendim erdhi pas shqetësimeve serioze për sigurinë në rrugët e kryeqytetit çek. Banorët ankohen se monopatinat lëvizin me shpejtësi të lartë në trotuare dhe parqe, duke rrezikuar kalimtarët. Po ashtu, ato bllokojnë hapësirat publike kur nuk përdoren, duke krijuar probleme në trotuare dhe vende parkimi.
Zëvendëskryetari i bashkisë theksoi se rregullat e reja do të ndihmojnë në pastrimin e hapësirave publike dhe do të ulin trafikun e pakontrolluar të skuterëve elektrikë. Ai shtoi se këto mjete shkaktojnë kaos sidomos në zonat ku lëvizin këmbësorët.
Autoritetet në Pragë duan gjithashtu të promovojnë më shumë përdorimin e biçikletave të përbashkëta, që konsiderohen më të sigurta. Statistikat tregojnë se monopatinat elektrike kanë shkallë më të lartë aksidentesh krahasuar me biçikletat.
Praga nuk është qyteti i vetëm që merr masa të tilla; edhe Parisi dhe Madridi kanë ndaluar përdorimin e tyre. Në Finlandë, nga ana tjetër, ndalohet përdorimi i monopatinave nga personat nën 15 vjeç.
Shqipëria gjithashtu ka pezulluar përdorimin e monopatinave derisa të miratohet një ligj i ri që do të përcaktojë rregullat e përdorimit. Kjo bën pjesë në një trend europian për rregullimin e trafikut me mjete të reja elektrike. Në shumë qytete, siguria e qytetarëve është kthyer në prioritet përpara përdorimit të lirë të monopatinave.
