Procesi i regjistrimit të popullsisë, banesave dhe biznesit në Shqipëri, i njohur tashmë si Cens 2023, kundërshtohet, sipas OMONIA-s dhe BDMEG, nga minoriteti etnik grek (MEG).
Nëpërmjet një deklarate për shtyp të publikuar të shtunën, OMONIA dhe BDMEG, konstatojnë se “procesi i Regjistrimit – Cens 2023 që do të nisë gjatë ditëve në vijim është shumë larg standarteve të proceseve analoge në terrenin evropian“.
Sipas tyre, ky proces, nga një procedurë e thjeshtë statistikore sikundër institucionet shtetërore pretendojnë, është kthyer në një operacion të mirëfilltë politik.
BDMEG dhe OMONOIA bënë të ditur se i kanë shprehur shqetësimet për Cens 2023 në nivel politik, institucional dhe parlamentar, përmes Kryetarit të PBDNJ-së, Vangjel Dule.
Këto dy organizata, konstatojnë se ka mungesë të vullnetit politik për të ndërtuar marrdhënie mirëbesimi me aktorë të minoritetit grek, se janë lënë jashtë procesit me qëllim, është shpërfillur implementimi në gjithë fazat e tij të regjistrimit në nivel bashkish, komunitetesh lokale, familjesh dhe personash subjekt regjistrimi kriteri i përfshirjes së përfaqësuesve të MEG.
“Nuk konstatohet asnjë vëmendje dhe kujdes në informimin dhe sensibilizimin e komunitetit të pjesëtarëve të MEG dhe në gjuhën amtare sikundër është detyrim, lidhur me procesin, metodologjinë dhe përmbajtjen e pyetësorit. Regjistruesit nuk kanë kualifikimin e duhur dhe aftësi objektive për të realizuar intervistën e plotësimit të pyetësorit në gjuhën amtare të pjesëtarëve të MEG. Pyetësori që do të aplikohet në rubrikat që i përkasin origjinës etnike, gjuhës amtare, besimit fetar etj., të qytetarëve, është qëllimisht evaziv dhe në këtë mënyrë nuk ka për synim qasjen e së vërtetës reale,” thuhet në deklaratën për shtyp.
Sipas OMONIA-s dhe BDMEG, përfaqësues të grupeve të interesit, në rastin konkret të minoritetit etnik grek, nuk kanë mundësi institucionale mbikëqyrjeje dhe aksesi gjatë mbledhjes dhe përpunimit definitiv të produktit të procesit.
“Procesi Regjistrimit të Popullsisë dhe Banesave – Cens 2023, është duke u implentuar me financim të Bashkimit Evropian në mëse 85% të kostos së tij. Në këto kushte BDMEG OMONOIA ndërsa apelon autoritetin shtetëror të Regjistrimit për inisiativa përmirësuese, shpreh shqetësim serioz se edhe një herë tjetër se nuk kanë për t’u garantuar rezultate të besueshme dhe mirëpranuara, duke rezervuar të drejtën e vëzhgimit permanent të procesit dhe ritrajtimit të çështjes në vijim,” thuhet në njoftimin për shtyp të këtyre 2 organizatave.
