Ministri i Punëve të Jashtme të Greqisë ka telefonuar kryediplomaten shqiptare Olta Xhaçka për çështjen e Fredi Belerit.
Sipas autoriteteve shtetërore greke theksohet se duke qëndruar në qeli, Beleri po privohet nga e drejta e tij politike për të ushtruar detyrat në krye të bashkisë së Himarës.
“Autoritetet shqiptare vazhdojnë të privojnë z. Beleri nga e drejta e tij politike për t’u betuar dhe ushtruar detyrat që i janë caktuar nga qytetarët e Himarës. Ministri i Punëve të Jashtme, George Gerapetritis i trajtoi të gjitha këto çështje në komunikimin e tij telefonik në homologun shqiptar”, thuhet në njoftimin e Ministrisë së Jashtme greke.
Ky qëndrim i Ministrisë së Jashtme greke vjen disa orë pasi SPAK çoi për gjykim Fredi Belerin i arrestuar për blerje votash dhe bashkëpunëtorin e tij, Pandeli Kokaveshi.
SPAK bëri të ditur se gjatë hetimeve u analizuan përgjimet audio dhe video si dhe u bë këqyrja e akteve të ekspertimit kompjuterik, nëpërmjet të cilave u provua, sipas Prokurorisë së Posaçme, përpjekja e Belerit për të blerë vota në zgjedhjet vendore të 14 majit.
Sipas SPAK, Beleri i ka ofruar Arsen Ramës shumat prej 50 euro për çdo person që ai do të gjente, që do votonte për Belerin si kandidat për kryetar të Bashkisë Himarë, në zgjedhjet vendore të datës 14 maj 2023. Vetë Arsen Ramës, Beleri i ka premtuar si shpërblim për shërbimin që do të kryente shumën 300 euro.
“Në rastin konkret të pandehurit e kanë kryer veprën penale me veprime aktive të kundërligjshme në dy forma të saj, si nëpërmjet premtimit dhe ofrimit të shumave monetare shtetasit Arsen Rama në mënyrë që ky i fundit të ndikonte tek vullneti i qytetarëve të tjerë për të siguruar vota në favor të të pandehurit Dhionisios Alfred Beleri në zgjedhjet vendore të datës 14.05.2023”, shkruan SPAK.
Beleri u arrestua më 12 maj, ndërsa hetimet ndaj tij kishin nisur që më 9 maj pas referimit të rastit nga policia e Vlorës. Në zgjedhjet e 14 majit, Beleri, kandidati i koalicionit “Bashkë Fitojmë” u shpall fitues në Bashkinë Himarë përballë Jorgo Goros me një diferencë prej 19 votash.
