Beteja të ashpra midis forcave ruse dhe atyre të fundit që po tentojnë të mbrojnë Mariupolin po zhvillohen në fabrikën e çelikut Azovstal, kanë thënë zyrtarët.
Siç edhe dihet tani, pavarësisht përpjekjeve për të evakuuar civilët e bllokuar në kompleksin në fjalë, qindra njerëz kanë mbetur të bllokuar, duke përfshirë rreth 30 fëmijë, tha kryebashkiaku i qytetit.
Por çfarë dihet deri më tani për fabrikën?
Fabrika, e vendosur në jug të qytetit port të Mariupol, është “skena” e një qëndrese të ukrainasve kundër forcave pushtuese të Rusisë.
Deri kohët e fundit Azovstal ishte një lojtar kryesor në skenën globale, duke prodhuar 4 milionë tonë çelik në vit dhe duke eksportuar shumicën e tij, sipas pronarit të saj Metinvest Holding, prodhuesi më i madh i çelikut në Ukrainë, përcjell Telegrafi.
Madje, nga rrokaqiejt Shard i Londrës te Hudson Yards në Manhattan deri te Ura San Giorgio e Gjenovës (e cila zëvendësoi urën e shembur Morandi), çeliku i prodhuar në Azovstal përdoret në disa nga monumentet më të njohura në botë.
Të paktën 150 punonjës janë vrarë dhe mijëra mbeten të pagjetur, tha Yuriy Ryzhenkov, CEO i Metinvest Holding, i cili zotëron fabrikën.
Para luftës, uzina punësonte 11,000 njerëz, tha ai, dhe stafi i kompanisë përfshin dinastitë familjare që kanë prodhuar çelik për aq kohë sa ata kujtojnë.
Çfarë dimë për situatën atje?
Komandanti i ushtarëve të Regjimentit Azov brenda uzinës, nënkoloneli Denys Prokopenko, thotë se brenda kompleksit ka “beteja të ashpra dhe të përgjakshme” pasi forcat ruse depërtuan në perimetrin e tij.
Kryetari i bashkisë së Mariupolit, Vadym Boichenko tha të mërkurën “artileri të rënda dhe tanke po qëllojnë në të gjithë kalanë, aviacioni gjithashtu, anijet janë afruar dhe po qëllojnë gjithashtu mbi kala”.
Boichenko bëri të ditur se kishte 30 fëmijë të bllokuar në fabrikë që ende prisnin të shpëtoheshin.
Fundjavën e kaluar, më shumë se 100 civilë u evakuuan nga fabrika e çelikut Azovstal dhe arritën të sigurt në Zaporizhzhia.
Luftëtarët brenda uzinës së rrethuar po “ndajnë ujë dhe ushqim” me civilët – por koha po mbaron, tha zëvendës komandanti Svyatoslav Palamar.
Të mërkurën, ministri i jashtëm ukrainas tha se uzina ende “po mbahet” pavarësisht sulmeve të pamëshirshme ruse.
Ministria ruse e Mbrojtjes thotë se pret të hapë korridoret e evakuimit për civilët nga uzina e çelikut Azovstal pranë Mariupol duke filluar nga e enjtja.
