Përzgjedhësi i Përfaqësueses së Kosovës, Bernard Challandes, ka insistuar se pret fitore edhe në ndeshjen miqësore ndaj Maltës.
Ai në konferencën për shtyp të enjten, ka thënë se do të kërkojë nga futbollistët që t’i qasen me seriozitetit më të madh duelit me Maltën.
Ndeshja mes Kosovës dhe Maltës, do të zhvillohet të premten prej orës 18:00 në “Worthersee Stadion” në Klagenfurt të Austrisë.
Kosova në këtë miqësore futet pas fitores së thellë që e regjistroi ndaj San Marinos (4:1), të zhvilluar të martën në Prishtinë.
Kosova të enjten ka arritur në Austri, ku do të zhvillojë një stërvitje para ndeshjes miqësore. Për këtë ndeshje, Challandes nuk do të llogarit në Vedat Muriqin e Samir Ujkanin që janë liruar me leje derisa Lorik Emini nuk ka udhëtuar për shkak të lëndimit.
“Edhe ndaj Maltës do të japim maksimumin dhe pres një ndeshje të mirë dhe qasje serioze sikurse ndaj San Marinos. Kjo do të jetë edhe kërkesa ime për futbollistët për ndeshjen ndaj Maltës dhe pres që ata t’i zbatojnë ato. Edhe në këtë ndeshje e presim fitorenm, pasi ne në secilën ndeshje duam të fitojmë”, është shprehur Challandes.
Fitore sikurse Challandesi ndaj Maltës, pret edhe mesfushori Herolind Shala, i cili mungoi në ndeshjen ndaj San Marinos për shkak të angazhimeve ndaj klubit të tij.
“Duhet të jemi të fokusuar edhe për ndeshjen me Maltën dhe nuk do të jetë lehtë pa praninë e tifozëve. Do të japim gjithçka nga vetja për të marrë një rezultat pozitiv edhe në këtë ndeshje”, është shprehur Shala.
