Normalisht do të ishte një finale e Champions, por tani Manchester City dhe Real Madrid luajnë për të evituar eliminimin e parakohëshëm.
Kjo është supersfida e fazës play-off, që vlen për një biletë në 1/8. Një klasike e futbollit kontinental, që do të zbresë në fushë dhjetëra kampionë të mëdhenj.
“Në vitet e fundit, ndeshjet e Manchester City dhe Real Madrid janë shndërruar në një sfidë të madhe. Në disa raste kemi fituar ne, në disa raste ata. Në dekadën e fundit është kthyer në një Klasike. Është e pamundur të kontrollohen lojtarë si Vinícius Júnior, Kylian Mbappé, Rodrygo dhe Jude Bellingham për 90 apo 180 minuta. Të gjithë janë të shkëlqyer. Nuk duhet t’u lëmë shumë hapësira. Shpresojmë të kualifikohemi”, tha Pep Guardiola, trajner i Manchester City, shkruan A2 CNN.
“Është e vërtetë, është kthyer në një klasike. Në vitet e mëparshme jemi përballur në çerekfinale apo në gjysmëfinale. Tani ndodhemi në një fazë më të largët, por jemi dy ekipe të forta. Ndeshjet tona kanë qenë gjithmonë të luftuara, të ekuilibruara dhe kështu do të ndodhë sërish. Nuk është e lehtë të luash kundër ekipeve të Guardiolës, edhe në momente të vështira ai propozon gjithmonë diçka të re”, tha Carlo Ancelotti, trajner i Real Madrid.
Mbrëmjen e kësaj të marte, në fushë zbresin edhe Juventusi përballë PSV, Paris Saint Germain në derbin kundër Brest dhe Borussia e Dortmundit, që sfidon Sportingun.
