Sot do të ndahen dy biletat e para për në gjysmëfinalen e Champions League. Spektakli dhe emocionet janë të garantuara kur në fushë do të zbresin gjigandë të futbollit europian si Barcelona apo Paris Saint Germain që kanë hedhur një hap të rëndësishëm drejt kalimit më tej që në ndeshjen e parë.
Spanjollët fituan 4-0 ndaj Dortmundit në sfidën e parë dhe ndeshja e sotme mund të jetë thjeshtë një formalitet megjithatë përballë Murit të Verdhë, detyra do të jetë e vështirë.
Barcelona këtë sezon mbetet e frikshme… Udhëheq në La Liga, është në finalen e Kupës së Mbretit dhe mbi të gjitha mbetet një kandidate serioze për të fituar Champions League.
Sa i përket organikës së dy skuadrave, te katalanasit mungon Ter Stegen, Casadó dhe Balde, të tre të dëmtuar ndërsa gjermanët vuajnë mungesën e Sabitzer.
Në takimin tjetër të se martës, Paris Siant Germain luan me hirushen e këtij kompeticioni Aston Villa.
Parisienët fituan në ndeshjen e parë me shifrat 3-1 në Park De Prince por ende nuk e kanë hipotekuar kalimin më tej. Lajmi i mirë është se të dyja skuadrat nuk kanë asnjë mungesë dhe do të zbresin në fushë me formacionin më të mirë.
Dortmund-Barcelona dhe Aston Villa -Paris Saint Germain do të luhen sot në mbrëmje në orën 21:00.
