Presidenti i ri i Këshillit Europian, ish-kryeministri belg, Charles Michel do të përfaqësojë interesat britanike në samitin që do të zhvillohet sot dhe të premten, njoftoi një zëdhënës britanik në Bruksel.
Samiti do të hapet ditën e zgjedhjeve në Britaninë e Madhe dhe kryeministri, Boris Johnson i cili është angazhuar për të nxjerrë Britaninë e Madhe nga Bashkimi Europian deri në fund të janarit, nuk do të udhëtojë në Bruksel.
“Konform praktikës në fuqi, Britania e Madhe ia ka besuar votën e saj presidentit të Këshillit që ai ta ushtrojë në emër të saj”, deklaroi zëdhënësi i përfaqësisë britanike.
Dita e parë e samitit do t’i kushtohet Paktit të Gjelbër kundër ndryshimit klimatik dhe buxhetit afatgjatë të BE-së, por zgjedhjet britanike do të kryesojnë të gjitha çështjet.
Pas-Brexit-i do të diskutohet të premten në ditën e dytë të samitit përmes negociatave për marrëdhënien e ardhshme tregtare të Londrës me 27 vendet e BE-së.
Johnson theksoi se do të nënshkruante një marrëveshje të re tregtare me BE-në deri në fund të periudhës së tranzicionit pas Brexit, deri më 31 dhjetor 2020 dhe se nuk do të kërkojë kohë shtesë në Bruksel.
Por, sipas ekspertëve për një marrëveshje tregtare të plotë do të duhet më shumë kohë./
