Pas Kalidou Koulibaly, Chelsea vazhdon të hedhë rrjetat për të rrëmbyer yjet e Serie A. Mbrojtësi u ble për 40 milionë euro nga Napoli dhe do të përfitojë 10 milionë euro në sezon nga kontrata 4-vjeçare. Sapo 31-vjeçari zbarkoi në Londër, nga Anglia nisën edhe zërat se Chelsea po interesohet për një tjetër yll të kampionatit italian.
Rafael Leao ka hyrë në radarin e bluve. Portugezi ishte një prej protagonistëve absolutë të titullit të 19-të në histori dhe Milani e cilëson të paprekshëm. Megjithatë, problem mbetet fakti që rinovimi i kontratës është bllokuar. Marrëveshja aktuale përfundon në vitin 2024, por palët janë larg të aspekti financiar.
Për të qëndruar me kuqezinjtë Leao pretendon të paguhet të paktën 6 milionë euro dhe kjo do ta bindte të rinovonte deri në vitin 2027. Chelsea po interesohet për situatën e sulmuesit, për të kuptuar edhe se cila mund të jetë lëvizja e radhës.
Në anën tjetër, Milani është deri diku i sigurt nga klauzola me vlerë 150 milionë euro për prishjen e kontratës. Kjo nuk i ka ndaluar pronarët e rinj amerikanë të bluve që të kontaktojnë përfaqësuesit e lojtarit. Pas Koulibaly, në Londër po përgatiten për afrimin e bujshëm të merkatos.
